ព័ត៌មានអន្ដរជាតិ

នាយករដ្ឋមន្ត្រីហុងគ្រីចោទសហភាពអឺរ៉ុបកំពុងរំលោភអំណាចខ្លួនរាល់ថ្ងៃ

បានផុស

២ years មុន

នៅ

ថ្ងៃអង្គារ ១៧ ឧសភា ២០២២

ដោយ

នាយករដ្ឋមន្ត្រីរបស់ប្រទេសហុងគ្រី លោក Viktor Orban នៅក្នុងសុន្ទរកថាទៅកាន់សមាជិកសភាបានចោទប្រកាន់ទីក្រុងព្រុចសែលពីបទរំលោភអំណាច ហើយក៏បានសន្យាទប់ទល់នឹងរបៀបវារៈរបស់សហភាពអឺរ៉ុបនៃភាពឆ្គួតខាងយ៉េនឌ័រ និងអឺរ៉ុបសេរីនិយម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃចន្ទ លោក Orban បានស្បថចូលកាន់តំណែង បន្ទាប់ពីត្រូវបានបោះឆ្នោតឲ្យក្លាយជានាយករដ្ឋមន្ត្រីអាណត្តិទី៤កាលពីខែមេសា។ លោកបានថ្លែងថា ៖«ទីក្រុងព្រុចសែលកំពុងរំលោភអំណាចរបស់ខ្លួនជារៀងរាល់ថ្ងៃ និងចង់បង្ខំពួកយើងឲ្យធ្វើនូវអ្វីដែលយើងមិនចង់»។

ក្នុងទស្សនៈរបស់លោក Orban ភាពដឹកនាំរបស់សហភាពអឺរ៉ុបកំពុងស្វែងរកការកាត់បន្ថយអធិបតេយ្យភាពរបស់រដ្ឋជាសមាជិក និងដើម្បីកសាង «សហរដ្ឋអាមេរិកនៃអឺរ៉ុប»។

«ភាពខុសគ្នានៃវប្បធម៌កំពុងកើនឡើងរវាងអឺរ៉ុបខាងលិច និងអឺរ៉ុបខាងកើត»។ Orban បានបញ្ជាក់។ ទោះបីជាយ៉ាងណា លោកបានអះអាងថា វាស្ថិតនៅក្នុងផលប្រយោជន៍របស់ហុងគ្រីក្នុងការបន្តនៅសហភាពអឺរ៉ុប ដរាបណាវាអាចនៅតែជាប្រទេសឯករាជ្យ និងសេរីភាព។

ដោយព្យាករថា ទសវត្សរ៍បច្ចុប្បន្ននឹងជា«យុគសម័យនៃគ្រោះថ្នាក់» ដែលពោរពេញដោយអសន្តិសុខជាមួយនឹងសង្គ្រាម ជំងឺរាតត្បាត និងការកើនឡើងនៃអន្តោប្រវេសន៍ដែលមានសក្តានុពល លោក Orban បានសន្យាទប់ទល់ចំពោះការប៉ុនប៉ងណាមួយរបស់ប្រទេសលោកខាងលិចដើម្បីធ្វើឲ្យហុងគ្រីជាប់ពាក់ព័ន្ធក្នុងអ្វីដែលលោកហៅថា «រលកអត្តឃាត»។

លោកមានប្រសាសន៍ថា ៖«ទិដ្ឋភាពនៃទសវត្សរ៍សង្គ្រាមនៅចំពោះមុខពួកយើង ក៏រាប់ទាំង រលកអត្តឃាតនៃពិភពលោកខាងលិចដែរ»។

«ក្នុងស្ថានភាពនេះ ផ្លូវសម្រាប់ហុងគ្រីត្រូវតែបង្កើត»។ លោកនាយករដ្ឋមន្ត្រីមានប្រសាសន៍មុនពេលបង្ហាញភាពប្រាកដប្រជាថា ជនរួមជាតិរបស់លោកអាចនឹងទប់ទល់នូវការវាយប្រហារលើអត្តសញ្ញាណជាតិ និងប្រពៃណីរបស់ពួកគេ ពីព្រោះថា ទាំងនេះគឺ ឆ្លាក់ចេញពីឈើខ្លឹម។

លោកបានសង្កត់ធ្ងន់ថា ៖«ណាតូជាអ្នកគាំទ្រដ៏រឹងមាំមួយ ប៉ុន្តែណាតូនឹងមិនការពារហុងគ្រីឲ្យពួកយើងទេ។ ការងារបន្ទាន់ចាំបាច់បំផុតគឺត្រូវពង្រឹងកម្លាំងទ័ពហុងគ្រី និងធ្វើឲ្យក្លាយជាកងកម្លាំងប្រដាប់អាវុធពិតប្រាកដ»៕

ប្រែសម្រួល៖ វីរបុត្រ
ប្រភព៖ RT

Related Topics:ប្រទេសហុងគ្រី