នាយករដ្ឋមន្ត្រីហុងគ្រី ចាញ់ឆ្នោតធ្ងន់ធ្ងរ បាត់បង់តំណែងធ្លាប់កាន់កាប់ ១៦ឆ្នាំ

ប្រវត្តិសាស្រ្តថ្មីត្រូវបានចារក្នុងប្រទេសហុងគ្រី លោកនាយករដ្ឋមន្ត្រីViktor Orbán បានចាញ់ឆ្នោតយ៉ាងធ្ងន់ធ្ងរ បាត់បង់អំណាចដែលកាន់កាប់អស់រយៈពេល១៦ឆ្នាំមកហើយ។

តាមការផ្សាយរបស់ RT នៅថ្ងៃចន្ទទី១៣ខែមេសាឆ្នាំ២០២៦ គណបក្ស Fidesz របស់លោកបានបរាជ័យក្រោមស្នាដៃគណបក្សប្រឆាំង Tisza ដឹកនាំដោយលោក Peter Magyar ក្នុងសំឡេង៣៩%ទល់នឹង៥២%។

ជ័យជម្នះភ្លូកទឹកភ្លូកដីនេះ ធ្វើឲ្យគណបក្ស Tisza ទទួលបានអាសន្នៈ ១៣៨ ក្នុងចំណោម ១៩៩ នៅក្នុងសភាជាតិ ដែលផ្តល់ឲ្យពួកគេនូវអំណាច «សំឡេងភាគច្រើនលើសលប់» ដែលអាចកែប្រែរដ្ឋធម្មនុញ្ញបាន។

លោក Orbán បានចេញមុខទទួលស្គាល់បរាជ័យនៅយប់ថ្ងៃបោះឆ្នោត ដោយលោកបានថ្លែងថា លទ្ធផលនេះគឺជារឿងឈឺចាប់ប៉ុន្តែច្បាស់លាស់។ លោកក៏ផ្ញើសារអបអរសាទរទៅកាន់លោក Péter Magyar ផងដែរ។

សូមជម្រាបថានេះគឺជាការបញ្ចប់យុគសម័យ «លទ្ធិប្រជាធិបតេយ្យអសេរី» ដែលលោក Orbán ខំកសាងអស់រយៈពេល ១៦ ឆ្នាំមកហើយ។

លោក Orbán គឺជាបុគ្គលដែលបង្ហាញជំហរម៉ឺងម៉ាត់គាំទ្ររុស្ស៊ីក្នុងប្រតិបត្តិការយោធានៅអ៊ុយក្រែន។ គោលនយោបាយនេះ ធ្វើឲ្យប្រជាជនខ្លួនមិនពេញចិត្តឡើយ ជាហេតុនាំឲ្យយុវជនហុងគ្រីយ៉ាងច្រើនសន្ធឹកសន្ធាប់បានចេញទៅបោះឆ្នោត ដើម្បីទាមទារការផ្លាស់ប្តូរ និងចង់ឲ្យប្រទេសវិលត្រឡប់ទៅរកគន្លងសហភាពអឺរ៉ុបវិញ។

ម្យ៉ាងប្រជាជនហុងគ្រីជាច្រើន ក៏មានការធុញទ្រាន់នឹងការចោទប្រកាន់ពីអំពើពុករលួយក្នុងរដ្ឋាភិបាល ផងដែរ៕

អត្ថបទ៖ សុខ សុវណ្ណ