សារព័ត៌មានជប៉ុន NHK ៖ អ្នកការទូត រុស្ស៊ី ប្រចាំ UN លាលែងពីតំណែង ជាការតវ៉ាប្រឆាំងសង្គ្រាមអ៊ុយក្រែន

អ្នកការទូតរុស្ស៊ីប្រចាំការិយាល័យអង្គការសហប្រជាជាតិនៅទីក្រុងហ្សឺណែវបានលាលែងពីតំណែងក្នុងការតវ៉ាប្រឆាំងនឹងសង្គ្រាមលុកលុយរបស់រុស្ស៊ីលើអ៊ុយក្រែន ។

ក្នុងលិខិតមួយដែលផ្ញើទៅកាន់បេសកកម្មការទូតបរទេសនៅទីក្រុងហ្សឺណែវ លោក Boris Bondarev បានប្រកាសពីការលាលែងរបស់គាត់ជាអ្នកការទូតរុស្ស៊ីប្រចាំ UN ហើយ ។

លោក Bondarev បានសរសេរថា “អស់រយៈពេល ២០ ឆ្នាំនៃអាជីពការទូតរបស់ខ្ញុំ ខ្ញុំបានឃើញការផ្លាស់ប្ដូរគោលនយោបាយការបរទេសរបស់យើងផ្សេងៗគ្នា ប៉ុន្តែខ្ញុំមិនដែលជួបរឿងអាម៉ាស់ចំពោះប្រទេសរបស់ខ្ញុំដូចការលុកលុយរបស់រុស្ស៊ីលើអ៊ុយក្រែននៅថ្ងៃទី ២៤ ខែកុម្ភៈឆ្នាំនេះនោះទេ” ។

លោកបានបន្តទៀតថា “សង្រ្គាមលុកលុយដែលបង្កឡើងដោយលោក ពូទីន ប្រឆាំងនឹងអ៊ុយក្រែន ក៏ដូចជាប្រឆាំងនឹងពិភពលោកលោកខាងលិចទាំងមូលនោះ មិនត្រឹមតែជាឧក្រិដ្ឋកម្មប្រឆាំងនឹងប្រជាជនអ៊ុយក្រែនប៉ុណ្ណោះទេ ប៉ុន្តែវាក៏ជាឧក្រិដ្ឋកម្មដ៏ធ្ងន់ធ្ងរបំផុតប្រឆាំងនឹងប្រជាជននៃប្រទេសរុស្ស៊ីផងដែរ” ។

គួរបញ្ជាក់ថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោក ពូទីន ហៅថាជា “ប្រតិបត្តិការយោធាពិសេស” បានអូសបន្លាយពេល ៣ ខែមកហើយ បន្ទាប់ពីការវាយលុករបស់ក្រុងមូស្គូលើក្រុងកៀវផ្ទុះឡើងកាលពីថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ទីក្រុងភាគខាងកើតមួយទៀតរបស់ អ៊ុយក្រែន ស្ទើរតែ ១០០ ភាគរយ ធ្លាក់ក្នុងកណ្ដាប់ដៃ រុស្ស៊ី