សភារុស្ស៊ី អនុម័តច្បាប់ លុបចោលដែនកំណត់អាយុ រើសទាហាន

សភារុស្ស៊ីបានអនុម័តច្បាប់ លុបចោលដែនកំណត់អាយុ សម្រាប់អ្នកចុះឈ្មោះចូលបម្រើកងទ័ព ដែលនេះជាសញ្ញាមួយថា ទីក្រុងមូស្គូអាចនឹងជ្រើសរើសទាហានបន្ថែមទៀត សម្រាប់យុទ្ធនាការយោធារបស់ខ្លួននៅប្រទេសអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្រោមច្បាប់បច្ចុប្បន្ន ជនជាតិរុស្ស៊ីដែលមានអាយុពី ១៨ ដល់ ៤០ ឆ្នាំ និងជនបរទេសដែលមានអាយុពី ១៨ ដល់ ៣០ ឆ្នាំ មានសិទ្ធិចុះហត្ថលេខាលើកិច្ចសន្យាសេវាកម្មយោធាដំបូងរបស់ពួកគេ។

សភាជាន់ទាប និងជាន់ខ្ពស់បានគាំទ្រសេចក្តីព្រាងច្បាប់នេះ ហើយនឹងត្រូវបញ្ជូនទៅកាន់ប្រធានាធិបតីរុស្ស៊ីលោក វ្ល៉ាឌីមៀរ ពូទីន ដើម្បីចុះហត្ថលេខាឲ្យក្លាយទៅជាច្បាប់ពេញលេញ។

នៅពេលក្លាយទៅជាច្បាប់ពេញលេញ​ នោះមានន័យថា រុស្ស៊ី អាចជ្រើសរើសជនជាតិរបស់ខ្លួនឲ្យចូលបម្រើទាហានទោះមានអាយុលើស៤០ឆ្នាំ និងជ្រើសរើសជនបរទេស ទោះមានអាយុលើស ៣០ឆ្នាំក៏ដោយ។

រុស្ស៊ី បានប្រកាសអំពីការស្លាប់ទាហានជាង ១០០០ នាក់ ចាប់តាំងពីខ្លួនវាយលុកអ៊ុយក្រែនកាលពីថ្ងៃទី២៤ខែកុម្ភៈ។ ទីក្រុងមូស្គូបានពណ៌នាការលុកលុយនេះថាជា “ប្រតិបត្តិការយោធាពិសេស” ក្នុងគោលបំណង លុបបំបាត់លទ្ធិណាស៊ីនិយម និងភាពគ្មានយោធារបស់អ៊ុយក្រែន ហើយសន្យា បន្តប្រយុទ្ធរហូតដល់គោលដៅ បានសម្រេច។

ប្រធានសភាលោក Viacheslav Volodin បាននិយាយនៅក្នុងសេចក្តីថ្លែងការណ៍មួយថា “យើងត្រូវពង្រឹងកងកម្លាំងប្រដាប់អាវុធ ជួយក្រសួងការពារជាតិ”។ លោកបន្ថែមថា “អគ្គមេបញ្ជាការកំពូលរបស់យើង កំពុងធ្វើគ្រប់យ៉ាងដើម្បីធានាថា កងទ័ពឈ្នះនិងបង្កើនប្រសិទ្ធភាពរបស់ខ្លួន”។

ការសម្រេចចិត្តរបស់សភារុស្ស៊ី កើតឡើងមួយថ្ងៃបន្ទាប់ពីរដ្ឋមន្ត្រីការពារជាតិ លោក Sergei Shoigu បានច្រានចោលការកំណត់ពេលសម្រាប់បញ្ចប់ប្រតិបត្តិការយោធានៅអ៊ុយក្រែន ហើយបានសង្កត់ធ្ងន់ថា ខ្លួននឹងបន្តរហូតដល់គោលដៅទាំងអស់បានសម្រេច។

អាជ្ញាធររុស្ស៊ីនិយាយថា មានតែទាហានកិច្ចសន្យាស្ម័គ្រចិត្តប៉ុណ្ណោះ ដែលត្រូវបានបញ្ជូនទៅប្រយុទ្ធនៅអ៊ុយក្រែន៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ អ៊ុយក្រែន មិនបានដាក់លក្ខខណ្ឌអ្វីទាំងអស់ សម្រាប់ការចាប់ផ្តើមកិច្ចចរចាឡើងវិញជាមួយ រុស្ស៊ី