ចិន បើកទីក្រុង សៀងហៃ ឡើងវិញ បន្ទាប់ពីបិទខ្ទប់រយៈពេល ២ខែ

អាជ្ញាធរក្រុងសៀងហៃ បាននិយាយថា ពួកគេនឹងចាត់វិធានការសំខាន់ៗមួយចំនួននៅថ្ងៃពុធទី១ខែមិថុនានេះ ដើម្បីបើកទីក្រុងឡើងវិញ បន្ទាប់ពីការបិទខ្ទប់រយៈពេលពីរខែដោយសារជំងឺកូវីដ១៩ ដែលបានកាត់ផ្តាច់ដំណើរការសេដ្ឋកិច្ចជាតិ និង បង្ខាំងមនុស្សរាប់លាននាក់នៅក្នុងផ្ទះរបស់ពួកគេ។

អភិបាលរងក្រុង លោកស្រី Zong Ming បាននិយាយកាលពីថ្ងៃអង្គារ ក្នុងសន្និសីទសារព័ត៌មានប្រចាំថ្ងៃស្តីពីការរីករាលដាលមេរោគក្នុងទីក្រុងនេះថា សេវាកម្មរថយន្តក្រុង និងរថភ្លើងក្រោមដីពេញលេញ នឹងត្រូវបើកឡើងវិញ ដូចជាការតភ្ជាប់ផ្លូវដែកជាមូលដ្ឋានជាមួយប្រទេសចិនផងដែរ។ អ្នកស្រីនិយាយថា “ជំងឺរាតត្បាត បានស្ថិតក្រោមការគ្រប់គ្រងយ៉ាងមានប្រសិទ្ធភាព”។

ស្របពេលជាមួយគ្នានោះ សាលារៀននឹងបើកឡើងវិញខ្លះៗ ដោយផ្អែកលើមូលដ្ឋានស្ម័គ្រចិត្តសម្រាប់សិស្ស ហើយផ្សារទំនើប ម៉ល និងហាងលក់ថ្នាំ នឹងបន្តបើកឡើងវិញជាបណ្តើរៗ ដោយមិនឲ្យមានមនុស្សចូលលើសពី៧៥%នោះទេ។ យ៉ាងណាក្តី រោងកុន និងកន្លែងហាត់ប្រាណនឹងនៅតែបន្តបិទ។

បុគ្គលិកក្រុង ​កំពុង​រុះរើ​រនាំង​មួយ​ចំនួន​ដែល​ត្រូវ​បាន​ដំឡើង​នៅ​តាម​ចិញ្ចើម​ផ្លូវ ​អំឡុង​ពេល​បិទ​ខ្ទប់។ មានមនុស្សតិចតួចបានដើរ ឬជិះកង់នៅតាមផ្លូវដែលភាគច្រើននៅតែទូលាយ។

លោក Li Qiang មន្ត្រីកំពូលមកពីបក្សកុម្មុយនិស្តចិនដែលកំពុងកាន់អំណាចនៅទីក្រុងសៀងហៃ ត្រូវបានដកស្រង់សម្តីក្នុងកិច្ចប្រជុំកាលពីថ្ងៃចន្ទ ដោយនិយាយថា ទីក្រុងនេះ បានបង្កើតសមិទ្ធផលសំខាន់ៗក្នុងការប្រយុទ្ធប្រឆាំងនឹងការផ្ទុះវីរុស តាមរយៈការតស៊ូជាបន្តបន្ទាប់។

ប៉ុន្តែមនុស្សជាងកន្លះលាននាក់នៅក្នុងទីក្រុង ដែលមានប្រជាជន២៥លាននាក់មួយនេះ នឹងមិនត្រូវបានអនុញ្ញាតឲ្យចេញក្រៅទេនៅថ្ងៃពុធនេះ ដោយសារតែករណីថ្មីៗ។

ទីក្រុងសៀងហៃ បានកត់ត្រាការឆ្លងថ្មីចំនួន ២៩ ករណីកាលពីថ្ងៃចន្ទ ដោយបន្តធ្លាក់ចុះជាលំដាប់ពីជាង ២០,០០០ ករណីក្នុងមួយថ្ងៃ កាលពីខែមេសា៕

ប្រែសម្រួល៖ Vann Vann

ប្រភព៖​ VOA

ចុចអាន៖ ស្អែកនេះ សៀងហៃ នឹងចាក់វ៉ាក់សាំងកូវីដដល់ក្មេងៗបរទេសអាយុ ១២ ឆ្នាំឡើងទៅ