បាញ់សម្លាប់រង្គាលទៀតហើយនៅអាមេរិក លើកនេះ ស្លាប់ ៤នាក់និងរបួសច្រើននាក់ (មានវីដេអូ)

តាមការឲ្យដឹងពីប៉ូលិស, មនុស្សចំនួន៤នាក់បានស្លាប់ និងច្រើននាក់រងរបួស បន្ទាប់ពីការបាញ់ប្រហារនៅអគារ Natalie នៃមន្ទីរពេទ្យ St. Francis ក្នុងទីក្រុង Tulsa រដ្ឋ Oklahoma កាលពីថ្ងៃពុធទី០១ខែមិថុនា។

នាយកដ្ឋានប៉ូលិស Tulsa បាននិយាយនៅក្នុងសេចក្តីថ្លែងការណ៍មួយថា “យើងដឹងថាមានអ្នករងរបួសជាច្រើន ហើយមានអ្នកស្លាប់ច្រើននាក់”។

ប៉ូលិស​បាន​ទទួល​ទូរស័ព្ទ​ រាយការណ៍ពី​បុរស​ម្នាក់​ដើរ​កាន់​កាំភ្លើង ​ក្បែរ​ការិយាល័យ​ពេទ្យ។ នៅពេលប៉ូលិសឆ្លើយតប ស្ថានការណ៍ប្រែក្លាយទៅជាការបាញ់ប្រហារយ៉ាងសកម្ម។ នេះបើយោងតាមលោក Richard Meulenberg ប៉ូលិសក្រុង Tulsa។

ពេល​ប៉ូលិស​ចូល​ទៅ​ក្នុង​អគារ គេ​​​ឃើញ​មនុស្ស​ជា​ច្រើន​នាក់ ​ត្រូវ​បាន​​បាញ់​សម្លាប់រួចទៅហើយ។ ខ្មាន់កាំភ្លើងក៏ស្លាប់ដែរ តែគេមិនច្បាស់ទេថាតើគាត់ត្រូវបានបាញ់ដោយប៉ូលិសឬក៏យ៉ាងណា។

ស្របពេលជាមួយគ្នានោះ ប៉ូលិសបានចូលឆែកឆេរតាមបន្ទប់នៃអគារវេជ្ជសាស្រ្តកម្ពស់៥ជាន់ ដើម្បីធានាសន្តិសុខ ខណៈមូលហេតុនៃការបាញប្រហារនេះ មិនទាន់ត្រូវបានគេដឹងភ្លាមៗឡើយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ ABC

ចុចអាន៖ ស្រ្តីម្នាក់ក្លាយជាវីរនារី ទប់ស្កាត់ការវាយប្រហារ កុំអីមានមនុស្សស្លាប់ច្រើននាក់ទៀតហើយនៅ អាមេរិក