ប្រមុខណាតូ ទៅអាមេរិក ដើម្បីពិភាក្សាជាមួយលោក Biden និងមន្ត្រីកំពូលៗ

អ្នកនាំពាក្យសេតវិមាន លោកស្រី Karine Jean-Pierre បាននិយាយថា ប្រធានាធិបតីសហរដ្ឋអាមេរិក លោក Joe Biden និងទីប្រឹក្សាសន្តិសុខជាតិលោក Jake Sullivan នឹងជួបជាមួយអគ្គលេខាធិការអង្គការណាតូ លោក Jens Stoltenberg នៅសេតវិមាន នៅថ្ងៃព្រហស្បតិ៍ទី០២ខែមិថុនា (ថ្ងៃសុក្រនៅកម្ពុជា)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Stoltenberg បានប្រាប់អ្នកយកព័ត៌មានបន្ទាប់ពីកិច្ចប្រជុំជាមួយរដ្ឋមន្ត្រីការបរទេសអាមេរិកលោក Antony Blinken ថា លោកនឹងកោះប្រជុំនៅទីក្រុងព្រុចសែលក្នុងរយៈពេលប៉ុន្មានថ្ងៃខាងមុខនេះ ជាមួយមន្ត្រីជាន់ខ្ពស់មកពីប្រទេសស៊ុយអែត ហ្វាំងឡង់ និងតួកគី ដើម្បីពិភាក្សាអំពីការប្រឆាំងរបស់ប្រទេសតួកគី មិនឲ្យ ស៊ុយអែត និងហ្វាំងឡង់ ចូលរួមក្នុងសម្ព័ន្ធភាពនេះ។

លោក Stoltenberg ក៏បានជួបជាមួយមន្ត្រីហ្វាំងឡង់ និងស៊ុយអែត ផងដែរ កាលពីដើមខែមុន បន្ទាប់ពីប្រទេសទាំង២ ដាក់សំណើរបស់ពួកគេ។ ប្រទេសទាំង៣០ របស់អង្គការណាតូ ត្រូវតែយល់ព្រមលើសមាជិកភាពរបស់ណាតូ ថ្វីបើតួកគីបានជំទាស់នឹងសមាជិកភាពរបស់ពួកគេក៏ដោយ។

កាលពីថ្ងៃសុក្រសប្តាហ៍មុន លោក Blinken និយាយថា សហរដ្ឋអាមេរិកមានទំនុកចិត្តថា ប្រទេសទាំងពីរនឹងអាចចូលរួមក្នុងសម្ព័ន្ធមិត្តយោធានេះបាន។

យោងលោក Blinken, “មានការឯកភាពគ្នាយ៉ាងខ្លាំង នៅក្នុងអង្គការណាតូ សម្រាប់សមាជិកភាពរបស់ប្រទេសហ្វាំងឡង់ និងស៊ុយអែត ហើយខ្ញុំនៅតែមានទំនុកចិត្តថា យើងនឹងធ្វើការតាមរយៈដំណើរការនេះយ៉ាងឆាប់រហ័ស ហើយអ្វីៗនឹងឆ្ពោះទៅមុខជាមួយប្រទេសទាំងពីរ”៕

ប្រែសម្រួល៖ Vann Vann

ប្រភព៖ Yahoo, Al Jazeera

ចុចអាន៖ គ្រាន់តែអាមេរិកប្រកាសផ្តល់រ៉ុកកែតឲ្យអ៊ុយក្រែនភ្លាម រុស្ស៊ី ធ្វើសមយុទ្ធបាញ់នុយក្លេអ៊ែរភ្លែត