ព័ត៌មានអន្ដរជាតិ

អ៊ុយក្រែនថា មីស៊ីលរុស្ស៊ី២គ្រាប់វាយប្រហារកក្រើកខណ្ឌពីរក្នុងទីក្រុងកៀវ

បានផុស

៤ years មុន

នៅ

ថ្ងៃចន្ទ ៦ មិថុនា ២០២២

ដោយ

យន្តហោះទម្លាក់គ្រាប់បែកយុទ្ធសាស្ត្ររុស្ស៊ីបានបាញ់មីស៊ីលចូលដល់ទីក្រុងកៀវពីចម្ងាយចេញពីសមុទ្រ Caspian Sea កាលពីថ្ងៃអាទិត្យ ទី៥ ខែមិថុនា និងបានផ្ទុះកក្រើកខណ្ឌពីរភាគខាងកើតរដ្ឋធានីរបស់អ៊ុយក្រែន។ កងទ័ពជើងអាកាស និងអភិបាលក្រុងអ៊ុយក្រែនបាននិយាយ។

លោកអភិបាលក្រុង Vitaly Klitschko បាននិយាយថា ផ្សែងខ្មៅងងិតហុយឡើងលើមេឃនៅខណ្ឌ Darnytskyi និង Dniprovskyi ជាយទីក្រុងកៀវ។ យ៉ាងហោចណាស់មនុស្សម្នាក់ត្រូវបានដឹកចូលមន្ទីរពេទ្យ ប៉ុន្តែមិនមានសេចក្តីរាយការណ៍ពីការស្លាប់ទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិករថាមពលគ្រប់គ្រងដោយរដ្ឋ Energoatom បាននិយាយតាម Telegram ថា មីស៊ីលរុស្ស៊ី១គ្រាប់បានហោះទាបមែនទែនលើរោងចក្រថាមពលនុយក្លេអ៊ែរដ៏ធំមួយនៅភាគខាងត្បូងតំបន់ Mykolaiv ហើយប្រហែលជាឆ្ពោះទៅទីក្រុងកៀវ។

យោងតាមលោក Serhiy Leshchenko ជំនួយការម្នាក់របស់ប្រធានបុគ្គលិករបស់លោកប្រធានាធិបតីអ៊ុយក្រែន Volodomyr Zelenskyy បាននិយាយថា មីស៊ីលសំដៅលើហេដ្ឋារចនាសម្ព័ន្ធផ្លូវដែកក្នុងទីក្រុង។

ក្រសួងការពារជាតិរុស្ស៊ីបាននិយាយថា ខ្លួនបានបាញ់គ្រាប់មីស៊ីលទៅទីក្រុងកៀវពីចម្ងាយឆ្ងាយ និងបានបំផ្លាញរថក្រោះ T-72 ព្រមទាំងរថពាសដែកដែលត្រូវបានឧបត្ថម្ភទៅអ៊ុយក្រែនដោយប្រទេសលោកខាងលិច។

កងការពារដែនអាកាសអ៊ុយក្រែនបាននិយាយថា កងទ័ពជើងអាកាសរបស់ខ្លួនបានបំផ្លាញមីស៊ីលនាំផ្លូវមួយវេលាម៉ោង៦ព្រឹក បន្ទាប់ពីបានកំណត់អត្តសញ្ញាណមីស៊ីលដែលកំពុងចូលមក។

មីស៊ីលទាំងនេះគឺជាមីស៊ីលដំបូងគេដែលបានវាយប្រហារចូលដល់ទីក្រុងកៀវគិតចាប់តាំងពីចុងខែមេសានៅពេលស្ត្រីជាផលិតករវិទ្យុម្នាក់ត្រូវបានសម្លាប់ដោយការវាយប្រហារមីស៊ីលរុស្ស៊ីមួយគ្រាប់លើអគារដែលគាត់រស់នៅ។

«យោងតាមទិន្ន័យបឋម រុស្ស៊ីបានបាញ់មីស៊ីលពីយន្តហោះចម្បាំង Tu-95 ចេញពីសមុទ្រ Caspian Sea»។ កងទ័ពជើងអាកាសអ៊ុយក្រែនបាននិយាយក្នុងសេចក្តីថ្លែងការណ៍មួយ។

ទីប្រឹក្សាប្រធានាធិបតី លោក Mykhailo Podolyak បានអំពាវនាវឲ្យប្រទេសលោកខាងលិចដាក់ទណ្ឌកម្មបន្ថែមទៀតលើរុស្ស៊ីចំពោះការវាយប្រហារ និងឲ្យឧបត្ថម្ភសព្វាវុធបន្ថែមទៀតដល់អ៊ុយក្រែន៕

ប្រែសម្រួល៖ វីរបុត្រ
ប្រភព៖ Reuters

Related Topics: