ព័ត៌មានអន្ដរជាតិ

ការប៉ះទង្គិចគ្នាក្នុងពន្ធនាគារ នៅស្រីលង្កា៖ អ្នកស្លាប់កើនដល់ ២៧នាក់ ក្នុងកុបកម្មដ៏ធំមិនធ្លាប់មាន

បានផុស

២ នាទី មុន

នៅ

ថ្ងៃអង្គារ ៧ កក្កដា ២០២៦

ដោយ

ប្រទេសស្រីលង្កាបានចាប់ផ្តើមការស៊ើបអង្កេតនៅថ្ងៃអង្គារនេះ ទៅលើកុបកម្មក្នុងពន្ធនាគារដ៏ធំរបស់ខ្លួនក្នុងរយៈពេលជាច្រើនឆ្នាំ ខណៈចំនួនអ្នកស្លាប់ដោយសារការប៉ះទង្គិចគ្នារវាងក្រុមឧក្រិដ្ឋជនគ្រឿងញៀនបានកើនឡើងដល់ ២៧នាក់។

ទីភ្នាក់ងារសារព័ត៌មាន AFP ផ្សាយនៅថ្ងៃទី៧ ខែកក្កដា ឆ្នាំ២០២៦ ឱ្យដឹងថា អាជ្ញាធរបានរឹតបន្តឹងសន្តិសុខ បន្ទាប់ពីការប៉ះទង្គិចគ្នាកាលពីថ្ងៃចន្ទ ធ្វើឱ្យមនុស្សជាង ១០០នាក់រងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងយុត្តិធម៌ស្រីលង្កា លោក Harshana Nanayakkara ប្រាប់សភានៅថ្ងៃអង្គារថា ការស៊ើបអង្កេតព្រហ្មទណ្ឌបានចាប់ផ្តើមជាមួយគណៈកម្មការដែលតែងតាំងដោយរដ្ឋាភិបាល។

ប៉ូលិសនិយាយថា ចំនួនអ្នកស្លាប់មានយ៉ាងហោចណាស់ ២៧នាក់ រួមទាំងអ្នកទោសម្នាក់ទៀតដែលស្លាប់កាលពីយប់មិញ។ ការស៊ើបអង្កេតបឋមបានរកឃើញថា ក្រុមចោរប្លន់បានប៉ះទង្គិចគ្នានៅក្នុងពន្ធនាគារនៅភាគខាងជើងនៃរដ្ឋធានី មុនពេលវាយលុកលើកងឆ្មាំ ដោយរឹបអូសអាវុធ។

លោក Nanayakkara និយាយថា អ្នកទោសក៏បានវាយកម្ទេចកាមេរ៉ាសុវត្ថិភាព CCTV ពេលមានភាពវឹកវរផងដែរ។

ដោយឡែក គ្រូពេទ្យនិយាយថា ជនរងគ្រោះចំនួន ៩៧នាក់ រួមទាំងមន្ត្រីពន្ធនាគារចំនួន ២៣នាក់ នៅតែស្ថិតក្នុងមន្ទីរពេទ្យ Negombo ដោយមានរបួសដោយសារគ្រាប់កាំភ្លើង ស្នាមកាត់ និងស្នាមជាំធ្ងន់ធ្ងរ។

អ្នកទោសចំនួន ១៩នាក់ផ្សេងទៀត កំពុងត្រូវបានព្យាបាលនៅមន្ទីរពេទ្យមួយក្នុងទីក្រុង Colombo ។

មន្ត្រីប៉ូលិសម្នាក់ប្រាប់ភ្នាក់ងារសារព័ត៌មាន AFP ថា ឆ្មាំចំនួន ៧នាក់ត្រូវបានសម្លាប់ នៅពេលពួកគេព្យាយាមបំបែកកុបកម្ម នៅថ្ងៃចន្ទ៕

សម្រួល៖ ណឺ មិនា

Related Topics:ស្រីលង្កា