អ៊ុយក្រែន កំពុងចាញ់សង្គ្រាម ព្រោះតែ រុស្ស៊ី មានកាំភ្លើងធំច្រើនជាង ១០ ទៅ ១៥ ដង

លោក Vadym Skibitsky អនុប្រធានផ្នែកចារកម្មយោធារបស់អ៊ុយក្រែនបាននិយាយថា “ឥឡូវនេះអ៊ុយក្រែនកំពុងចាញ់សង្គ្រាម ដោយសារតែរុស្ស៊ីមានកាំភ្លើងធំច្រើនជាងអ៊ុយក្រែនរហូតដល់ទៅ ១០ ទៅ ១៥ ដងឯណោះ ហើយដៃគូលោកខាងលិចបានផ្តល់អាវុធឲ្យយើងប្រហែល ១០ ភាគរយប៉ុណ្ណោះនៃអាវុធដែលពួកគេមាន” ។

លោកបានប្រាប់កាសែត The Guardian ក្នុងបទសម្ភាសន៍ថ្មីៗនេះថា អាយុជីវិតរបស់អ៊ុយក្រែនអាស្រ័យទៅលើការផ្ដល់អាវុធបន្ថែមទៀតរបស់បណ្ដាប្រទេសលោកខាងលិច ដោយសារតែបច្ចុប្បន្នជាសង្គ្រាមកាំភ្លើងធំ ។

លោក Skibitsky បាននិយាយថា “ក្នុងមួយថ្ងៃៗអ៊ុយក្រែនប្រើប្រាស់គ្រាប់បាញ់រាប់ពាន់គ្រាប់ ហើយភាពជោគជ័យរបស់យើងកំពុងពឹងផ្អែកលើការផ្គត់ផ្គង់ពីលោកខាងលិច ហើយបើមានការយឺតយ៉ាវនោះ យើងនឹងចាញ់សង្គ្រាមរុស្ស៊ីហើយ” ។

កន្លងមក អ៊ុយក្រែនធ្លាប់បានជំរុញឲ្យបណ្តាប្រទេសលោកខាងលិចផ្តល់អាវុធរយៈចម្ងាយឆ្ងាយដើម្បីការពារប្រឆាំងនឹងកាំភ្លើងធំរបស់រុស្ស៊ីនៅតំបន់ Donbas ភាគខាងកើត ដែលជាបន្ទាយដ៏សំខាន់នៃជម្លោះរយៈពេល ១៥ សប្តាហ៍ ដែលបានសម្លាប់មនុស្សរាប់ពាន់នាក់ និងរាប់លាននាក់ផ្លាស់ទីលំនៅ ។

បច្ចុប្បន្នកងកម្លាំងរុស្សី និងអ៊ុយក្រែនកំពុងប្រយុទ្ធគ្នាយ៉ាងខ្លាំងក្លានៅក្នុងតំបន់ Donbas ភាគខាងកើត ជាពិសេសនៅក្នុងទីក្រុង Severodonetsk ដែលត្រូវបានចាត់ទុកថាមានសារៈសំខាន់ចំពោះយុទ្ធសាស្ត្ររបស់រុស្ស៊ីនៅភាគខាងកើត ហើយវាក៏ការសម្រេចជោគវាសនារបស់តំបន់ Donbas ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Business Insider

ចុចអាន ៖ រុស្ស៊ី បន្ថែមមីស៊ីលបាញ់ចេញពីនាវាមុជទឹកនៅសមុទ្រខ្មៅ ត្រៀមបាញ់ទៅ អ៊ុយក្រែន