រុស្ស៊ី បាញ់ស្រោចមីស៊ីលលើរដ្ឋធានី កៀវ ជាលើកដំបូង ក្នុងរយៈពេល ៣សប្តាហ៍ (មានវីដេអូ)

យោងតាមប្រភពពីអ៊ុយក្រែនបានឲ្យដឹងថា លោក ពូទីន បានវាយប្រហាររដ្ឋធានី កៀវ ជាលើកដំបូងក្នុងរយៈពេលប៉ុន្មានសប្តាហ៍ ដោយបាញ់មីស៊ីលចំនួន ១៤ គ្រាប់ ស្រោចលើទីក្រុង និងតំបន់ជុំវិញ បណ្តាលឲ្យមានមនុស្សច្រើននាក់រងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុង កៀវ បានរីករាយនឹងសន្តិភាព និងស្ងប់ស្ងាត់រយៈពេលបីសប្តាហ៍មកហើយ រហូតដល់ការវាយប្រហារកាលពីព្រឹកថ្ងៃអាទិត្យទី២៦ខែមិថុនា ដែលនេះជាការវាយប្រហារលើកដំបូងចាប់តាំងពីថ្ងៃទី៥ខែមិថុនាមក។

ការផ្ទុះធំៗជាច្រើន បានអង្រួនរដ្ឋធានីនៅម៉ោងប្រហែល ៦:៣០នាទីព្រឹក។

ក្រុមមន្ត្រីនិយាយថា វាលឿនពេកក្នុងការនិយាយថាតើមាននរណាម្នាក់បាត់បង់ជីវិតដែរឬក៏អត់ ហើយប្រធានរដ្ឋបាលយោធាក្នុងតំបន់ លោក Oleksiy Kuleba បាននិយាយថា ប្រព័ន្ធការពារដែនអាកាស បានបាញ់ទម្លាក់មីស៊ីលមួយគ្រាប់ នៅភូមិមួយក្នុងតំបន់ជុំវិញនោះ។

ស្របពេលជាមួយគ្នានោះ លោក Vitali Klitshko អភិបាលក្រុង កៀវ និយាយថា “យើងកំពុងធ្វើអ្វីគ្រប់យ៉ាងតាមដែលអាចធ្វើទៅបាន ដើម្បីបញ្ឈប់ការបាញ់ប្រហារ ហើយយកមនុស្សចេញពីអគារដែលត្រូវបំផ្លាញ។ យើងសង្ឃឹមថា គ្មាននរណាម្នាក់ស្លាប់ទេប៉ុន្តែព័ត៌មានចុងក្រោយ យើងនឹងទទួលបានក្នុងរយៈពេលពីរបីម៉ោងទៀត”។

លោក​បាន​ហៅ​ការ​វាយ​ប្រហារ​នេះ ​ថា​ជា​ការ​ប៉ុនប៉ង​បំភិត​បំភ័យ​ទីក្រុងកៀវ ​មុន​កិច្ច​ប្រជុំ​កំពូល G7 និង​ណាតូ​ ដែល​ប្រព្រឹត្ត​ទៅ​ក្នុង​សប្តាហ៍​នេះ។

គួរបញ្ជាក់ថា ការវាយលុកភាគច្រើនរបស់រុស្ស៊ីប្រឆាំងនឹងអ៊ុយក្រែន បានផ្តោតទៅលើតំបន់ Donbas នៅភាគខាងកើត ជាកន្លែងដែលពួកគេ ប្រកាសគ្រប់គ្រងទីក្រុង Severodonetsk ទាំងស្រុង បន្ទាប់ពីកងទ័ពអ៊ុយក្រែន ដកខ្លួនចេញ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី ប្រាប់ទីតាំងដែលត្រូវទម្លាក់គ្រាប់បែកមុនគេ ពេលសង្គ្រាមលោកលើកទី៣ ផ្ទុះឡើង