លោក ពូទីន បញ្ជាឲ្យបន្តប្រតិបត្តិការយោធា បន្ទាប់ពីដណ្តើមបានតំបន់ Lugansk (មានវីដេអូ)

ប្រធានាធិបតីរុស្ស៊ី លោក វ្ល៉ាឌីមៀរ ពូទីន កាលពីថ្ងៃចន្ទទី០៤ខែកក្កដា បានបញ្ជាឲ្យរដ្ឋមន្ត្រីការពារជាតិ លោក Sergei Shoigu ជំរុញការវាយលុករបស់ទីក្រុងមូស្គូក្នុងប្រទេសអ៊ុយក្រែន ជាបន្តទៀត បន្ទាប់ពីកងទ័ពបានកាន់កាប់តំបន់ Lugansk ទាំងមូល។

លោកពូទីន បានប្រាប់លោក Shoigu ថា “អង្គភាពយោធា រួមទាំងក្រុមបូព៌ា និងក្រុមខាងលិច ត្រូវតែបំពេញភារកិច្ចរបស់ពួកគេតាមផែនការដែលបានអនុម័តពីមុន។ ខ្ញុំសង្ឃឹមថា អ្វីៗនឹងបន្តក្នុងទិសដៅរបស់ពួកគេ ដូចដែលបានកើតឡើងនៅ Luhansk”។

ដោយឡែក លោក Shoigu បានប្រាប់លោក ពូទីន កាលពីចុងសប្តាហ៍នេះថា កងកម្លាំងរបស់ទីក្រុងមូស្គូឥឡូវនេះ បានគ្រប់គ្រងទាំងស្រុងលើតំបន់ Luhansk ដែលនេះជាជ័យជម្នះដ៏សំខាន់សម្រាប់វិមានក្រឹមឡាំង ក្នុងរយៈពេលជាង ៤ខែបន្ទាប់ពីមេដឹកនាំរបស់ខ្លួន បានបញ្ជូនកងទ័ពចូលទៅក្នុងប្រទេសអ៊ុយក្រែន។

ទោះបីជាយ៉ាងណាក៏ដោយ កាលពីថ្ងៃចន្ទ លោក ពូទីន បានប្រាប់ឲ្យ កងទ័ពដែលចូលរួមក្នុងយុទ្ធនាការនៅ Luhansk គួរតែសម្រាកសិន និងកសាងសមត្ថភាពប្រយុទ្ធរបស់ពួកគេជាថ្មី។

គួរបញ្ជាក់ថា បន្ទាប់ពីបោះបង់គោលដៅដំបូងរបស់ខ្លួន ក្នុងការដណ្តើមយករដ្ឋធានី កៀវ ក្រោយមានការតស៊ូ យ៉ាងស្វិតស្វាញពីសំណាក់អ៊ុយក្រែន, រុស្ស៊ីបានបង្វែរកិច្ចខិតខំប្រឹងប្រែងរបស់ខ្លួនលើការដណ្តើមយកតំបន់ Donetsk និង Luhansk នៅភាគខាងកើតអ៊ុយក្រែន វិញ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Moscow Times

ចុចអាន៖ វិមានក្រឹមឡាំង៖ អ៊ុយក្រែន ត្រូវតែទទួលយក រាល់លក្ខខណ្ឌរបស់ រុស្ស៊ី