លោក Zelensky បណ្តេញមន្ត្រីជាន់ខ្ពស់ ២រូប ពាក់ព័ន្ធអំពើក្បត់ជាតិ និងសហការជាមួយ រុស្ស៊ី

លោកប្រធានាធិបតី Volodymyr Zelensky បានបណ្តេញប្រមុខទីភ្នាក់ងារសន្តិសុខអ៊ុយក្រែន (SBU) និងអគ្គរដ្ឋអាជ្ញា ដោយលើកឡើងពីករណីក្បត់ជាតិជាច្រើន នៅក្នុងអង្គភាពដ៏មានឥទ្ធិពលទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបាននិយាយថា អតីតបុគ្គលិកជាង ៦០នាក់ ឥឡូវនេះកំពុងធ្វើការប្រឆាំងនឹងអ៊ុយក្រែន នៅក្នុងតំបន់ដែលកាន់កាប់ដោយរុស្ស៊ី។ លោកបន្ថែមថា ករណីសហការ និងអំពើក្បត់ជាតិសរុប ៦៥១ ករណី ត្រូវបានបើកប្រឆាំងនឹងមន្ត្រីអនុវត្តច្បាប់។

ទោះបីជាយ៉ាងណាក៏ដោយ មន្ត្រីដែលត្រូវបានបណ្តេញចេញគឺលោក Ivan Bakanov និងលោកស្រី Iryna Venediktova មិនបានធ្វើអត្ថាធិប្បាយអ្វីទេ។

នៅក្នុងសុន្ទរកថាជាវីដេអូ កាលពីល្ងាចថ្ងៃអាទិត្យទី១៧ខែកក្កដា លោក Zelensky បាននិយាយថា “អំពើឧក្រិដ្ឋកម្មជាច្រើនបែបនេះ ប្រឆាំងនឹងមូលដ្ឋានគ្រឹះនៃសន្តិសុខជាតិរបស់រដ្ឋ បានបង្កជាសំណួរធ្ងន់ធ្ងរដល់ប្រមុខពាក់ព័ន្ធ នៃអង្គភាពទាំងពីរ។ សំណួរនីមួយៗ នឹងទទួលបានចម្លើយត្រឹមត្រូវ”។

គួរបញ្ជាក់ថា ការបណ្តេញប្រមុខ SBU លោក Ivan Bakanov ដែលជាមិត្តភក្តិកុមារភាពរបស់លោក Zelensky បានធ្វើឡើង បន្ទាប់ពីការចាប់ខ្លួនអតីតប្រធាន SBU ប្រចាំតំបន់ Crimea។ លោក Oleh Kulinych ត្រូវបានគេសង្ស័យថា ប្រព្រឹត្តអំពើក្បត់ជាតិ៕

ប្រែសម្រួល៖ Vann Vann

ប្រភព៖ BBC

ចុចអាន៖ EU នឹងផ្តោតលើ មាស របស់រុស្ស៊ី ក្នុងកញ្ចប់ទណ្ឌកម្មថ្មី