EU ត្រៀម​ទិញ​យន្តហោះ​ពន្លត់​ភ្លើង​ឆេះ​ព្រៃ ខណៈ​វិបត្តិ​អាកាសធាតុ​ កាន់​តែ​ធ្ងន់ធ្ងរ

ប្រធានផ្នែកគ្រប់គ្រងវិបត្តិរបស់សហភាពអឺរ៉ុប (EU) បានប្រាប់រ៉យទ័រថា EU កំពុងពិភាក្សាជាមួយក្រុមហ៊ុនផលិតយន្តហោះនានា ដើម្បីប្រយុទ្ធនឹងការកើនឡើងហានិភ័យនៃភ្លើងឆេះព្រៃដ៏ធ្ងន់ធ្ងរ ជាពិសេសភ្លើងឆេះព្រៃនៅអឺរ៉ុបខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ធនធានគ្រាអាសន្នរបស់ EU បច្ចុប្បន្ន បានសម្របសម្រួល និងផ្តល់មូលនិធិដល់ការដាក់ពង្រាយយន្តហោះពន្លត់អគ្គិភ័យចំនួន ១២គ្រឿង និងឧទ្ធម្ភាគចក្រមួយគ្រឿង។ ប៉ុន្តែខណៈដែលសំណើបន្ទាន់ត្រូវបានគេរំពឹងថា នឹងមានកម្រិតខ្ពស់ដោយសារតែការប្រែប្រួលអាកាសធាតុនោះ, EU គ្រោងនឹងវិនិយោគលើយន្តហោះឆ្លើយតបគ្រាមានវិបត្តិ។ នេះបើតាមការលើកឡើងពី ស្នងការ EU សម្រាប់ទទួលបន្ទុកគ្រប់គ្រងវិបត្តិលោក Janez Lenarcic។

លោក Lenarcic និយាយថា “យន្តហោះទាំងនេះ នឹងត្រូវបានទិញតាមលក្ខណៈបច្ចេកទេសដោយប្រទេសជាសមាជិក ប៉ុន្តែវានឹងត្រូវបានផ្តល់ហិរញ្ញប្បទាន ១០០ ភាគរយដោយ EU”។

ទោះបីជាយ៉ាងណាក៏ដោយ លោក Lenarcic បានបដិសេធ បញ្ចេញឈ្មោះក្រុមហ៊ុនដែលពាក់ព័ន្ធ ខណៈកិច្ចសន្យាមិនទាន់ត្រូវបានចុះហត្ថលេខានៅឡើយទេ ប៉ុន្តែបាននិយាយថា ផែនការនឹងចាប់ផ្តើមការផលិតឡើងវិញនូវយន្តហោះ ដែលបូមទឹកដើម្បីពន្លត់ភ្លើង។

កាលពីថ្ងៃចន្ទ អ្នកពន្លត់អគ្គិភ័យរាប់ពាន់នាក់នៅទូទាំងតំបន់អឺរ៉ុបភាគខាងត្បូង កំពុងប្រយុទ្ធនឹងភ្លើងឆេះព្រៃរាប់រយកន្លែងនៅក្នុងប្រទេសនានារួមទាំងព័រទុយហ្គាល់ អេស្ប៉ាញ និងបារាំង ចំពេលមានរលកកម្តៅខ្លាំង ដែលបណ្តាលឲ្យមនុស្សរាប់រយនាក់ស្លាប់។

ដោយសារបម្រែបម្រួលអាកាសធាតុបង្កទៅជា ភ្លើងឆេះព្រៃ រលកកម្តៅ និងលក្ខខណ្ឌស្ងួត, ប្រទេសជាច្រើនទៀតកំពុងស្នើសុំជំនួយសង្គ្រោះបន្ទាន់ ដើម្បីពន្លត់ភ្លើង។

EU បានទទួលសំណើសុំជំនួយចំនួន៥រួចទៅហើយ ក្នុងឆ្នាំនេះ។ ថ្វីបើតំបន់សមុទ្រមេឌីទែរ៉ាណេ មិនទាន់ធ្វើដំណើរបានពាក់កណ្ដាលផ្លូវនៃរដូវភ្លើងឆេះព្រៃ នៅខែមិថុនាដល់ខែកញ្ញាក៏ដោយ ប៉ុន្តែលោក Lenarcic និយាយថា ទ្វីបអឺរ៉ុបកំពុងប្រឈមមុខនឹងរដូវក្តៅដ៏លំបាកមួយ។

EU បានបញ្ជូនយន្តហោះពន្លត់អគ្គិភ័យទៅកាន់ប្រទេសនានា ដូចជាព័រទុយហ្គាល់ បារាំង និងស្លូវេនីក្នុងខែនេះ ដោយប្រើប្រាស់អាងយន្តហោះ មកពីប្រទេសនានា រួមមាន ក្រូអាស៊ី បារាំង និងអេស្ប៉ាញ។ EU ក៏បានដាក់ពង្រាយអ្នកពន្លត់អគ្គិភ័យចំនួន២០០នាក់នៅក្នុងប្រទេសក្រិក ដើម្បីគាំទ្រក្រុមក្នុងស្រុកផងដែរ៕

ប្រែសម្រួល៖ Vann Vann

ប្រភព៖ CNA

ចុចអាន៖ រលកកម្តៅសម្លាប់មនុស្សជាង ១០០០នាក់ទូទាំងទ្វីបអឺរ៉ុប ស្របពេលភ្លើងឆេះព្រៃ ក៏កំពុងវាយប្រហារខ្លាំងក្លា