អាមេរិកព្រមានថា ចិន អាចបាញ់មីស៊ីល ជិតកោះតៃវ៉ាន់ ឬធ្វើសកម្មភាពយោធាទ្រង់ទ្រាយធំ បើលោកស្រី Pelosi បំពេញទស្សនកិច្ច (មានវីដេអូ)

សេតវិមានបានព្រមានថា ប្រទេសចិន អាចនឹងឆ្លើយតបទៅនឹងដំណើរទស្សនកិច្ចរបស់ប្រធានសភាអាមេរិក លោកស្រី Nancy Pelosi ទៅកាន់កោះតៃវ៉ាន់ ជាមួយនឹងការបង្កហេតុខាងយោធា។

អ្នកនាំពាក្យសន្តិសុខជាតិរបស់សេតវិមាន លោក John Kirby បាននិយាយថា នេះអាចរាប់បញ្ចូលទាំងការបាញ់មីស៊ីលនៅជិតកោះតៃវ៉ាន់ ឬសកម្មភាពជើងអាកាស ឬជើងទឹកទ្រង់ទ្រាយធំផងដែរ។

យោងតាមប្រព័ន្ធផ្សព្វផ្សាយរបស់តៃវ៉ាន់ និងសហរដ្ឋអាមេរិក, លោកស្រី Pelosi មានគម្រោងទៅទស្សនកិច្ចទីក្រុងតៃប៉ិ ប៉ុន្តែរឿងនេះមិនត្រូវបានបញ្ជាក់ដោយរដ្ឋាភិបាលសហរដ្ឋអាមេរិកឡើយ។

លោក Kirby លើកឡើងថា សកម្មភាពរបស់ចិននាថ្ងៃខាងមុខ​ អាចរួមបញ្ចូលទាំងការទាមទារផ្លូវច្បាប់ផងដែរ ឧទាហរណ៍ ដូចជាការអះអាងថា ច្រកសមុទ្រតៃវ៉ាន់មិនមែនជាផ្លូវទឹកអន្តរជាតិនោះទេ។

សញ្ញាផ្សេងទៀតបង្ហាញថា ទីក្រុងប៉េកាំងអាចនឹងបញ្ជូនយន្តហោះទៅកាន់កោះនេះ ដែលជាផ្នែកមួយនៃការលុកលុយ ចូលទៅក្នុងដែនអាកាសរបស់តៃវ៉ាន់តែម្តង។

តៃវ៉ាន់គឺ​ជា​កោះ​គ្រប់គ្រង​ដោយ​ខ្លួនឯង ប៉ុន្តែ​ចិន​អះអាង​ថា ​នឹង​មាន​ផលវិបាក​ធ្ងន់ធ្ងរ ប្រសិនបើ​លោកស្រី Pelosi ទៅ​ទីនោះ​។

កាលពីថ្ងៃចន្ទ បេសកជនអង្គការសហប្រជាជាតិរបស់ប្រទេសចិន លោក Zhang Jun បានព្រ​មានថា ដំណើរទស្សនកិច្ចនេះ នឹងធ្វើឲ្យខូចដល់ទំនាក់ទំនងរវាងទីក្រុងប៉េកាំង និងវ៉ាស៊ីនតោន។

លោកស្រី Pelosi ដែលជាឥស្សរជនជាន់ខ្ពស់នៅក្នុងគណបក្សប្រជាធិបតេយ្យ បានរិះគន់យ៉ាងចាស់ដៃទៅលើការដឹកនាំរបស់ប្រទេសចិន ដោយបានបរិហារកំណត់ត្រាសិទ្ធិមនុស្សរបស់ទីក្រុងប៉េកាំង។ លោកស្រី ធ្លាប់ជួបអ្នកគាំទ្រលទ្ធិប្រជាធិបតេយ្យ និងបានទៅទស្សនាទីលាន Tiananmen ដើម្បីគោរពវិញ្ញាណក្ខន្ធជនរងគ្រោះនៃការសម្លាប់រង្គាលឆ្នាំ ១៩៨៩។

ប្រធានសភាអាមេរិករូបនេះ ​បាន​ចាប់​ផ្តើម​ដំណើរ​ទស្សនកិច្ច​នៅអាស៊ី​ កាល​ពី​ថ្ងៃ​អាទិត្យទី៣១ខែកក្កដា ដោយ​នឹង​ឈប់នៅ​ប្រទេស​សិង្ហបុរី ម៉ាឡេស៊ី កូរ៉េ​ខាង​ត្បូង និង​ជប៉ុន។

ដើមឡើយ លោកស្រីមានគម្រោងទៅកោះតៃវ៉ាន់នៅក្នុងខែមេសា ប៉ុន្តែបានពន្យារពេលការធ្វើដំណើរនោះវិញ បន្ទាប់ពីឆ្លងជំងឺកូវីដ១៩៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ចិន ធ្វើសមយុទ្ធបាញ់គ្រាប់ពិត ជិតកោះតៃវ៉ាន់ ចំពេលប្រធានសភាអាមេរិក បំពេញទស្សនកិច្ច អាស៊ី