ចិន ធ្វើសមយុទ្ធបាញ់គ្រាប់ពិត ជិតកោះតៃវ៉ាន់ ចំពេលប្រធានសភាអាមេរិក បំពេញទស្សនកិច្ច អាស៊ី

កាលពីចុងសប្តាហ៍​ យោធាចិន បានធ្វើសមយុទ្ធបាញ់គ្រាប់ពិត នៅឯឆ្នេរសមុទ្ររបស់ខ្លួន ក្បែរកោះតៃវ៉ាន់ ចំពេលប្រធានសភាអាមេរិក លោកស្រី Nancy Pelosi កំពុងធ្វើដំណើរទស្សនកិច្ចតំបន់អាស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានផ្លូវការ​ ស៊ីនហួរ បានប្រកាសថា កងទ័ពរំដោះប្រជាជនចិន កំពុងធ្វើសមយុទ្ធបាញ់គ្រាប់ពិតនៅជិតកោះ Pingtan នៃខេត្ត Fujian ខណៈរដ្ឋបាលសុវត្ថិភាពដែនសមុទ្របានព្រមានឲ្យកប៉ាល់ទាំងឡាយ ចៀសវាងតំបន់នោះ។

លំហាត់បែបនេះជាធម្មតាពាក់ព័ន្ធនឹងកាំភ្លើងធំ។ ប៉ុន្តែសេចក្តីប្រកាសមួយ មិនបានបញ្ជាក់ថាតើការធ្វើសមយុទ្ធនេះអាចរួមបញ្ចូលទាំងមីស៊ីល យន្តហោះចម្បាំង ឬអាវុធផ្សេងទៀតដែរឬក៏អត់នោះទេ។

ទន្ទឹមនេះ នាវាពីរគ្រឿងផ្សេងទៀតដែលក្រុមសង្កេតការណ៍ដែនសមុទ្រមានមូលដ្ឋាននៅវៀតណាម Duan Dang កំណត់ថាជានាវាពិឃាតចិនប្រភេទ 052D និងនាវាចម្បាំងប្រភេទ 054A, ត្រូវបានគេមើលឃើញនៅចម្ងាយជាង ២០គីឡូម៉ែត្រពីច្រកសមុទ្រតៃវ៉ាន់។ នាវាទាំងពីរ​ត្រូវបាន​បំពាក់​ដោយមីស៊ីលបាញ់​ពី​ដី​ទៅ​អាកាស​។

ស្របពេលជាមួយគ្នានោះ កងទ័ពជើងទឹកចិន កំពុងធ្វើសមយុទ្ធយោធានៅឆ្នេរសមុទ្រភាគខាងត្បូងរបស់ខ្លួន ក្បែរទីក្រុង Guangdong បន្ទាប់មកធ្វើសមយុទ្ធនៅខេត្ត Hainan ក្បែរនោះ។

សមយុទ្ធនេះកើតឡើង ចំពេលប្រធានសភាតំណាងរាស្រ្តអាមេរិក លោកស្រី Nancy Pelosi ចាប់ផ្តើមដំណើរទស្សនកិច្ចទៅកាន់ប្រទេសអាស៊ីចំនួន ៤។

ការិយាល័យរបស់លោកស្រីបាននិយាយនៅក្នុងសេចក្តីប្រកាសព័ត៌មានកាលពីថ្ងៃអាទិត្យថា “លោកស្រី Nancy Pelosi កំពុងដឹកនាំគណៈប្រតិភូសភា ទៅកាន់តំបន់ឥណ្ឌូប៉ាស៊ីហ្វិក រួមទាំងដំណើរទស្សនកិច្ចទៅកាន់ប្រទេសសិង្ហបុរី ម៉ាឡេស៊ី កូរ៉េខាងត្បូង និងជប៉ុន ផងដែរ”។

យោងតាមសេចក្តីថ្លែងការណ៍, ដំណើរនេះនឹងរួមបញ្ចូលប្រទេសទាំងនោះ ប៉ុន្តែមិនបានបញ្ជាក់ថាតើលោកស្រី Pelosi អាចនឹងឈប់សំចតនៅកន្លែងផ្សេងទៀត ដែរឬក៏អត់៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ លោកស្រី Pelosi ចាប់ផ្តើមដំណើរទស្សនកិច្ច នៅអាស៊ី ហើយ