ព័ត៌មានអន្ដរជាតិ

មីយ៉ាន់ម៉ា ឲ្យគណបក្សនយោបាយទាំងអស់សុំការអនុញ្ញាតជាមុនសិន បើចង់ជួបអង្គការអន្តរជាតិ

បានផុស

៣ years មុន

នៅ

ថ្ងៃចន្ទ ១៥ សីហា ២០២២

ដោយ

គណៈកម្មាធិការរៀបចំការបោះឆ្នោតដែលគ្រប់គ្រងដោយយោធារបស់មីយ៉ាន់ម៉ាបានចេញសេចក្តីជូនដំណឹងតម្រូវឲ្យគណបក្សនយោបាយទាំងអស់សុំការអនុញ្ញាតជាមុនសិន បើចង់ជួបជាមួយជនបរទេស ឬអង្គការអន្តរជាតិណាមួយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកែតម្រូវសុំឲ្យមានការអនុញ្ញាតជាមុននេះកើតឡើង បន្ទាប់ពីគណៈកម្មាធិការរៀបចំការបោះឆ្នោតក្រោមការគ្រប់គ្រងរបស់យោធាដែលកំពុងដឹកនាំប្រទេស កាលពីថ្ងៃព្រហស្បតិ៍សប្ដាហ៍មុន បានចេញវិធានការកំណត់មិនឲ្យគណបក្សនយោបាយទាំងអស់ជួបជាមួយជនបរទេស ឬអង្គការអន្តរជាតិណាមួយឡើយ នៅមុនការបោះឆ្នោតដែលគ្រោងនឹងធ្វើឡើងនៅឆ្នាំក្រោយ ។

ទន្ទឹមនោះ ប្រព័ន្ធផ្សព្វផ្សាយក្នុងប្រទេសមីយ៉ាន់ម៉ាក៏បានរាយការណ៍ដែរថា “គណៈកម្មាធិការរៀបចំការបោះឆ្នោតក៏បញ្ជាឲ្យគណបក្សនយោបាយត្រូវតែគោរពច្បាប់ប្រទេស ហើយប្រសិនបើភាគីទាំងអស់មិនបំពេញ ឬអនុវត្តតាមតម្រូវការនេះ ការចុះបញ្ជីគណបក្សនយោបាយរបស់ពួកគេនឹងត្រូវលុបចោល” ។

សេចក្តីថ្លែងការណ៍ក៏បានអះអាងដែរថា ការធ្វើបែបនេះ ក៏ដោយសារតែកន្លងមកមានភាពមិនប្រក្រតីបានកើតឡើងក្នុងអំឡុងពេលបោះឆ្នោតសកលខែវិច្ឆិកា ឆ្នាំ ២០២០ ដោយមានការជ្រៀតជ្រែកពីស្ថានទូតបរទេស ក៏ដូចជាអង្គការសង្គមស៊ីវិលជាដើម ។

ដោយឡែកលោក Ko Ko Gyi មកពីគណបក្សប្រជាជនគាំទ្រលទ្ធិប្រជាធិបតេយ្យបានប្រាប់អ្នកសារព័ត៌មានថា ការជួបជាមួយអង្គការបរទេស និងការទទួលបានជំនួយពីពួកគេគឺជាបញ្ហាផ្សេងគ្នា ហើយការរឹតបន្តឹងនេះគឺមិនអាចអនុវត្តបានទេ វាគឺខុសច្បាប់ទាំងស្រុង ។

ជាចុងក្រោយលោកបញ្ជាក់ថា ការជូនដំណឹងនេះមានគោលបំណងតាមដានចំណាត់ការរបស់អន្តរជាតិដើម្បីគាំទ្រដល់កម្លាំងគាំទ្រលទ្ធិប្រជាធិបតេយ្យក្នុងប្រទេសមីយ៉ាន់ម៉ា បន្ទាប់ពីផ្ទុះការខឹងសម្បារយ៉ាងខ្លាំងពាក់ព័ន្ធនឹងការប្រហារជីវិតសកម្មជនគាំទ្រលទ្ធិប្រជាធិបតេយ្យចំនួន ៤ រូបកាលពីខែមុន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ក្រុមហ៊ុនអគ្គិសនី ឡាវ ប្រឈមបញ្ហាកង្វះថវិកា ព្រោះលក់តម្លៃទាបជាងថ្លៃដើម