ប៉ូឡូញ ស្រង់ត្រីជាង ១០០ តោនចេញពីទន្លេ ក្រោយងាប់មិនដឹងមូលហេតុ

ត្រី​ងាប់​ជាង​ ១០០ ​តោន​ត្រូវ​បានស្រង់ចេញពីទន្លេ Oder បន្ទាប់ពីពួកវារាប់ពាន់ក្បាលបានងាប់ទាំងមិនដឹងមូលហេតុ ខណៈប្រទេសអាល្លឺម៉ង់ និងប៉ូឡូញបានហាមឃាត់ប្រជាជនមិនឲ្យងូតទឹក ក៏ដូចជានេសាទនៅក្នុងទន្លេរបស់អឺរ៉ុបមួយនេះ ។

លោកស្រី Monika Nowakowska-Drynda មកពីការិយាល័យអ្នកពន្លត់អគ្គីភ័យជាតិប៉ូឡូញបាននិយាយថា អ្នកពន្លត់អគ្គីភ័យជាង ៥០០ នាក់បាននិងកំពុងស្រង់ត្រីដែលងាប់នៅក្នុងប្រទេសប៉ូឡូញ ដោយមានជំនួយពីឧបករណ៍ជាច្រើន រួមទាំងយន្តហោះគ្មានមនុស្សបើកផងដែរ ។

លោកស្រី Nowakowska-Drynda បាននិយាយថា “ត្រី​ងាប់​ប្រហែល ១០០ ​តោនត្រូវ​បាន​រក​ឃើញ​​តាំង​ពីខែមុនមកម្ល៉េះ ហើយចំពោះការស្រង់ត្រីងាប់ទាំងនេះចេញពីទន្លេដ៏ធំបែបនេះគឺជាប្រតិបត្តិការដែលយើងមិនធ្លាប់ធ្វើពីមុនមកទេ” ។

ប្រតិបត្តិការស្រង់ចេញនេះកើតឡើង បន្ទាប់ពីក្រុមអ្នកពន្លត់អគ្គីភ័យប៉ូឡូញបានរកឃើញត្រីងាប់ចំនួន ១០០ តោនពីទន្លេ Oder ដែលហូរកាត់ប្រទេសអាល្លឺម៉ង់ និងប៉ូឡូញ ដែលធ្វើឲ្យមានការព្រួយបារម្ភកាន់តែខ្លាំងឡើងអំពីគ្រោះមហន្តរាយបរិស្ថាន ។

ចំណែកនាយករដ្ឋមន្ត្រីប៉ូឡូញលោក Mateusz Morawiecki បាននិយាយកាលពីសប្តាហ៍មុនថា “មូលហេតុ​នៃ​ការ​ងាប់ត្រីទាំងនេះ​គឺ​មិនទាន់ច្បាស់នោះទេ ប៉ុន្តែពួកវា​ទំនងជា​ត្រូវបាន​បំពុល ដោយសារតែមានបរិមាណដ៏ធំនៃកាកសំណល់គីមីត្រូវបានគេបោះចូលទៅក្នុងទន្លេ ទើបមានហានិភ័យ និងផលវិបាកបែបនេះ” ។

គួរបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ ទន្លេ Oder ត្រូវបានគេចាត់ទុកជាទន្លេស្អាត ហើយត្រីក្នុងស្រុកចំនួន ៤០ ប្រភេទក៏ត្រូវបានរកឃើញផងដែរនៅក្នុងផ្លូវទឹកដ៏វែងជាងគេលំដាប់ទី ២ របស់ប្រទេសមួយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ RTE