ប៉ូឡូញ៖ សម្ពាធ​គួរ​តែ​ដាក់​លើ​រុស្ស៊ី មិន​មែន​ជំរុញ​ឲ្យ​អ៊ុយក្រែន​បោះ​បង់​ចោល​ទឹកដី​ទេ

នាយករដ្ឋមន្ត្រីប៉ូឡូញ លោក Donald Tusk បាននិយាយថា គ្មាននរណាម្នាក់គួរដាក់សម្ពាធប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី ​ឲ្យ​ប្រគល់ទឹកដី​ឲ្យ​រុស្ស៊ីឡើយ ដោយសង្កត់ធ្ងន់ថា សម្ពាធគួរតែត្រូវបានដាក់​ទៅ​លើ​​ទីក្រុងមូស្គូ ដើម្បីបញ្ចប់ការឈ្លានពានរបស់ខ្លួន។

បើ​តាម​ការ​ចុះ​ផ្សាយ​របស់ Ukrainska Pravda លោក Tusk បានថ្លែង​កាលពីថ្ងៃអាទិត្យ​ទី​១៩​ខែ​តុលា​ថា «មិន​គួរ​មាន​នរណាម្នាក់ក្នុងចំណោមពួកយើង​ដាក់សម្ពាធលើ​ហ្សេលេនស្គី​ទេ នៅពេលនិយាយអំពីសម្បទានទឹកដី។ យើងទាំងអស់គ្នាគួរតែដាក់សម្ពាធលើប្រទេសរុស្ស៊ី ដើម្បីបញ្ឈប់ការឈ្លានពានរបស់ខ្លួន។ ​សម្បទាន​ទឹកដី​មិន​ដែល​ជា​ផ្លូវ​ទៅ​រក​សន្តិភាព​ដ៏​ត្រឹមត្រូវ និង​យូរអង្វែង​ឡើយ​»​។

ការកត់សម្គាល់របស់លោក Tusk បានកើតឡើងចំពេលមានការជជែកដេញដោលកាន់តែខ្លាំងឡើងលើការជំរុញនាពេលថ្មីៗនេះរបស់ប្រធានាធិបតីអាមេរិក ដូណាល់ ត្រាំ សម្រាប់បទឈប់បាញ់​រវាង​រុស្ស៊ី​និង​អ៊ុយក្រែន ហើយ​ជា​ពិសេស​បន្ទាប់​ពី​របាយការណ៍ដែល​ថា លោក​ត្រាំ​​បានជំរុញ​លោក​ហ្សេលេនស្គី​ឲ្យ​ទទួលយកលក្ខខណ្ឌរបស់រុស្ស៊ីដើម្បីបញ្ចប់សង្គ្រាម។

ក្នុងអំឡុងពេលកិច្ចប្រជុំដ៏តានតឹងមួយនៅឯសេតវិមានកាលពីថ្ងៃទី​១៧​ខែតុលា លោកត្រាំ​ តាមសេចក្តីរាយការណ៍បានព្រមាន​លោក​ហ្សេលេនស្គី​​ថា ប្រធានាធិបតីរុស្ស៊ីលោកវ្ល៉ាឌីមៀរ​ពូទីនអាច«បំផ្លាញ»ប្រទេស​អ៊ុយក្រែន ប្រសិនបើទីក្រុង​កៀវ​​មិនព្រមចរចា។ នេះបើយោងតាម​​ប្រភព​របស់​សារព័ត៍មាន Financial Times។

យោងតាមកាសែត The Washington Post វិញ លោកពូទីន​បានទាមទារការគ្រប់គ្រងពេញលេញលើតំបន់ Donetsk ដែលជាផ្នែក​មួយ​នៃកិច្ចព្រមព្រៀងសន្តិភាពដ៏មានសក្តានុពល ខណៈពេលដែលលោកបានណែនាំថា លោកអាចនឹងបោះបង់ចោលផ្នែក​ខ្លះ​នៃតំបន់ Zaporizhzhia និង Kherson ដែលនៅតែស្ថិតនៅក្រោមការកាន់កាប់របស់រុស្ស៊ី។

លោកត្រាំ​ក៏បានបដិសេធក្នុងការផ្តល់​ឲ្យ​អ៊ុយក្រែននូវមីស៊ីល Tomahawk រយៈចម្ងាយឆ្ងាយ ទោះបីជាមានការស្នើសុំម្តងហើយម្តងទៀតពីទីក្រុង​កៀវ​​ក៏ដោយ។ លោក​បាន​អះអាង​ថា ការ​កើន​ឡើង​បន្ថែម​ទៀត​នឹង​ពន្យារ​ពេល​ជម្លោះ និង​ប្រឈម​នឹង​ការ​ខាត​បង់​បន្ថែម​ទៀត​ក្នុង​អំឡុង​ពេល​រដូវរងា​ខាង​មុខ៕

ដោយ៖ ឈាង