អឺរ៉ុប ចេញច្បាប់ថ្មី ផ្តោតសំខាន់លើ សេរីភាពសារព័ត៌មាន

គណៈកម្មការអឺរ៉ុប បានបង្ហាញនូវបទប្បញ្ញត្តិថ្មីដែលខ្លួនអះអាងថា នឹងការពារប្រព័ន្ធផ្សព្វផ្សាយឯករាជ្យ ប្រឆាំងនឹងការជ្រៀតជ្រែក និងការឃ្លាំមើលផ្នែកនយោបាយ។

ច្បាប់ស្តីពីសេរីភាពសារព័ត៌មាន ដែលត្រូវបានបញ្ចេញកាលពីថ្ងៃសុក្រទី១៦ខែកញ្ញា នឹងហាមឃាត់ការប្រើប្រាស់ Spyware និងយុទ្ធសាស្ត្រឃ្លាំមើលផ្សេងទៀតប្រឆាំងនឹងអ្នកសារព័ត៌មាន និងសមាជិកគ្រួសាររបស់ពួកគេ ហើយហាមឃាត់ការឆែកឆេរ និងការរឹបអូសការិយាល័យប្រព័ន្ធផ្សព្វផ្សាយ លើកលែងតែនៅលើមូលដ្ឋាននៃសន្តិសុខជាតិប៉ុណ្ណោះ។

Spyware គឺជាកម្មវិធីមួយ ដែលអាចប្រមូលយកព័ត៌មាន ពីនរណាម្នាក់ ឬពីអង្គភាពណាមួយដោយមិនឲ្យពួកគេដឹងខ្លួន ហើយក៏អាចបញ្ជូនព័ត៌មានទាំងនោះ​ទៅកា​ន់អ្នកដទៃទៀតបានដែរ។

ច្បាប់នេះក៏នឹងតម្រូវឲ្យក្រុមហ៊ុនប្រព័ន្ធផ្សព្វផ្សាយបង្ហាញភាពជាម្ចាស់របស់ពួកគេ និងជម្លោះផលប្រយោជន៍ដែលអាចមានឥទ្ធិពលលើសេចក្តីរាយការណ៍របស់ពួកគេផងដែរ។

ច្បាប់នេះថែមទាំងបង្កើតក្រុមប្រឹក្សាអ៊ឺរ៉ុបឯករាជ្យ សម្រាប់សេវាប្រព័ន្ធផ្សព្វផ្សាយ ដែលនឹងត្រូវជ្រោមជ្រែងដោយ អាជ្ញាធរប្រព័ន្ធផ្សព្វផ្សាយជាតិ ហើយមានភារកិច្ចផ្តល់ប្រឹក្សាលើបញ្ហាបទប្បញ្ញត្តិ រួមទាំងការបែងចែកការផ្សាយពាណិជ្ជកម្មរបស់រដ្ឋ និងការប្រមូលផ្តុំអំណាចនៅក្នុងដៃរបស់ក្រុម​ហ៊ុនប្រព័ន្ធផ្សព្វផ្សាយមួយចំនួនទៀតផង។

ស្ថាប័ននេះក៏មានគោលបំណងការពារប្រឆាំងនឹងការឈ្លានពានលើប្រព័ន្ធផ្សព្វផ្សាយ ដែលមិនមែនជាសហភាពអឺរ៉ុប និងធានាថា វេទិកាអ៊ីនធឺណិតសកលលោក អនុលោមតាមគំនិតផ្តួចផ្តើមដោយស្ម័គ្រចិត្តរបស់សហភាពអឺរ៉ុប ដូចជា ក្រមប្រតិបត្តិស្តីពីព័ត៌មានមិនពិតផងដែរ។

ទោះច្បាប់នេះការពារប្រឆាំងនឹងការដកចេញដោយអយុត្តិធម៌នៃមាតិកាប្រព័ន្ធផ្សព្វផ្សាយដែលផលិតដោយយោងតាមស្តង់ដារវិជ្ជាជីវៈក៏ដោយ ប៉ុន្តែវារួមបញ្ចូលនូវចន្លោះប្រហោងដ៏ធំ ដែលអនុញ្ញាតឲ្យមានការដកចេញនូវខ្លឹមសារបែបនេះក្នុងករណីបង្កហានិភ័យជាប្រព័ន្ធដូចជាព័ត៌មានមិនពិតជាដើម។

នៅក្នុងវិធានការបង្ក្រាបដែលមិនធ្លាប់មានពីមុនមកកាលពីដើមឆ្នាំនេះ EU បានហាមប្រាមសារព័ត៌មាន RT និង Sputnik យ៉ាងដាច់ខាត ដោយលើកឡើងពីការផ្សាយព័ត៌មានមិនពិតជាប្រព័ន្ធ ទាក់ទងនឹងជម្លោះនៅអ៊ុយក្រែន ហើយបានកែប្រែក្រមប្រតិបត្តិរបស់ខ្លួន ស្តីពីព័ត៌មានមិនពិតដើម្បីកំណត់គោលដៅជាក់លាក់ចំពោះប្រទេសរុស្ស៊ី និងប្រព័ន្ធផ្សព្វផ្សាយរុស្ស៊ី។

រដ្ឋាភិបាលអ៊ឺរ៉ុបជាច្រើន ត្រូវបានគេរិះគន់ចំពោះការជ្រៀតជ្រែក ក្នុងការអនុវត្តសារព័ត៌មានក្នុងរយៈពេលប៉ុន្មានខែថ្មីៗនេះ រួមទាំងប្រទេសក្រិកផងដែរ ដែលបាន Hack ចូលទូរស័ព្ទរបស់អ្នកកាសែតហិរញ្ញវត្ថុម្នាក់ ក៏ដូចជាប្រទេសអាល្លឺម៉ង់ ដែលបានរឹបអូសគណនីធនាគាររបស់អ្នកកាសែតម្នាក់ និងបានគំរាមដាក់ពន្ធនាគារនាង ៣ឆ្នាំដោយសារតែ សេចក្តីរាយការណ៍របស់នាង៕

ប្រែសម្រួល៖ Vann Vann

ប្រភព៖ RT

ចុចអាន៖ អឺរ៉ុប ចង់បង្កើតច្បាប់ការពារប្រព័ន្ធផ្សព្វផ្សាយពីការជ្រៀតជ្រែកដោយ​បរទេស