លោកខាងលិចគាំទ្របន្តសង្គ្រាម រុស្ស៊ី-អ៊ុយក្រែន ឯប្រទេសអឺរ៉ុបមួយនេះចង់​បានសន្តិភាព

នាយករដ្ឋមន្ត្រីហុងគ្រីលោក Viktor Orban បាននិយាយ អំឡុងពេលថ្លែងសុន្ទរកថានៅក្នុងរដ្ឋសភាកាលពីថ្ងៃអង្គារថា ប្រទេសលោកខាងលិចគឺគាំទ្រដល់សង្គ្រាមរុស្ស៊ី-អ៊ុយក្រែន ខណៈហុងគ្រីគឺចង់បានសន្តិភាព ។

លោក Orban បាននិយាយថា “បច្ចុប្បន្នលោកខាងលិចពេញចិត្តនឹងសង្រ្គាម ហើយហុងគ្រីគឺអនុគ្រោះដល់សន្តិភាព ។ យើងទាមទារឲ្យមានបទឈប់បាញ់ និងកិច្ចចរចាសន្តិភាពជាបន្ទាន់ ជំនួសឲ្យការបន្ត និងធ្វើឲ្យសង្រ្គាមកាន់តែធ្លាក់ចូលជ្រៅ” ។

លោកនាយករដ្ឋមន្ត្រីបាននិយាយទៀតថា សង្គ្រាមរុស្ស៊ី-អ៊ុយក្រែននឹងអូសបន្លាយពេល ដោយសារសហរដ្ឋអាមេរិក និងសហភាពអឺរ៉ុបគាំទ្រអ៊ុយក្រែនដោយផ្ដល់សព្វាវុធ និងសម្ភារៈ ខណៈដែលទុនបម្រុងរបស់រុស្ស៊ីក៏គឺគ្មានដែនកំណត់ទាំងមនុស្ស និងអាវុធ ។

ទន្ទឹមនោះ លោក Orban ក៏បានរិះគន់ទណ្ឌកម្មដែលដាក់លើរុស្ស៊ីផងដែរ ហើយបានអះអាងថា ប្រសិនបើទណ្ឌកម្មត្រូវបានដកចេញនោះ តម្លៃថាមពល និងអតិផរណានឹងធ្លាក់ចុះពាក់កណ្តាល ។

ជាចុងក្រោយលោក Orban បានឲ្យដឹងបន្ថែមថា ការដាក់ទណ្ឌកម្មមិនបានធ្វើឲ្យប៉ះពាល់ដល់ប្រទេសរុស្ស៊ីនោះទេ ផ្ទុយទៅវិញ ពលរដ្ឋអឺរ៉ុបឯណោះទេដែលរងផលប៉ះពាល់យ៉ាងធ្ងន់ធ្ងរនោះ ពោលរុស្ស៊ីរកបាន ១៥៨ ពាន់លានដុល្លារពីការនាំចេញថាមពល ចាប់តាំងពីការចាប់ផ្តើមនៃសង្រ្គាម ដោយសារតែតម្លៃថាមពលកើនឡើង ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ សម្ព័ន្ធមិត្តលោក ពូទីន ប្រាប់ជំហរប្រើអាវុធនុយក្លេអ៊ែរ