កម្មវិធីស្បៀងអាហារពិភពលោក ព្រមានពីវិបត្តិជីជាសកល

កម្មវិធីស្បៀងអាហារពិភពលោក (WFP) បានព្រមានកាលពីថ្ងៃចន្ទថា វិបត្តិស្បៀងអាហារលើពិភពលោកក៏កំពុងត្រូវបានផ្សំឡើងដោយវិបត្តិជីផងដែរ ។

លោក David Beasley នាយកប្រតិបត្តិកម្មវិធីស្បៀងអាហារពិភពលោកបាននិយាយនៅឯសន្និសីទ IMF ស្តីពីការដោះស្រាយអសន្តិសុខស្បៀងដែលរៀបចំដោយប្រទេសអារ៉ាប៊ីសាអូឌីតថា “ប្រសិនបើយើងមិនទទួលបានជីនោះទេ អ្នកនឹងមានបញ្ហាតម្លៃអាហារដូចដែលយើងកំពុងប្រឈមមុខនាពេលនេះ ហើយអ្នកនឹងមានបញ្ហាអាហាររហូតដល់នៅឆ្នាំ ២០២៣ ។ នៅពេលដែលវាកើតឡើង វានឹងក្លាយទៅជាឋាននរកនៅលើផែនដី ហើយនេះជាសោកនាដកម្មនៅលើសោកនាដកម្ម” ។

លោក Beasley បានពន្យល់ថា ពាក់កណ្តាលនៃបន្ទុកការផ្តល់អាហារដល់ប្រជាជនពិភពលោកចំនួន ៧.៧៥ ពាន់លាននាក់ គឺពឹងផ្អែកលើជី ពោលមិនមែនត្រឹមតែលំហូរនៃគ្រាប់ធញ្ញជាតិពីកំពង់ផែរបស់អ៊ុយក្រែនប៉ុណ្ណោះទេ ។

លោកបានព្រមានថា “កត្តាសេដ្ឋកិច្ចក្នុងសតវត្សទី ២១ នេះកាន់តែអាក្រក់ទៅៗ ដូចជា ជំងឺរាតត្បាតកូវីដ ១៩, វិបត្តិអាកាសធាតុ, ជម្លោះរុស្ស៊ី-អ៊ុយក្រែន និងអតិផរណាតម្លៃម្ហូបអាហារដែលមិនធ្លាប់មានពីមុនមក ហើយវាត្រូវបានគេមើលឃើញដូចគ្នាទៅនឹងអំឡុងពេលនៃការបះបោររបស់អារ៉ាប់” ។

ជាចុងក្រោយលោក Beasley បានបញ្ជាក់ថា ចម្លើយចំពោះរយៈពេលអូសបន្លាយណាមួយនៃវិបត្តិស្បៀងអាហារគឺស្ថិតនៅលើបញ្ហាទាំងអស់ ប៉ុន្តែការបង្កើតហិរញ្ញប្បទានជាយុទ្ធសាស្ត្រ និងកម្មវិធីដែលអភិវឌ្ឍនិរន្តរភាព និងភាពធន់ គឺជារឿងចាំបាច់បំផុតដើម្បីទប់ស្កាត់វិបត្តិទាំងនោះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អតីតសមាជិកព្រឹទ្ធសភា អាមេរិក ប្រាប់លក្ខខណ្ឌកើតមានសន្តិភាពនៅ អ៊ុយក្រែន