WFP ផ្អាក​ជំនួយ​ដល់​មនុស្ស៦៥ម៉ឺននាក់នៅ​អេត្យូពី ដោយសារកង្វះថវិកា​

ការចេញផ្សាយរបស់សារព័ត៌មាន​ Al Jazeera នៅថ្ងៃទី២៣ខែមេសានេះបានឲ្យដឹងថា កម្មវិធីស្បៀងអាហារពិភព​លោក (WFP) បា​ន​ប្រកាស​​ផ្អាកជំនួយសម្រាប់ស្ត្រី និងកុមារដែលខ្វះអាហារូបត្ថម្ភចំនួន​៦៥ម៉ឺននាក់ នៅក្នុងប្រទេស​អេត្យូពី​ក្នុង​តំបន់​អាហ្រិ្វក​ដោយសារតែ​កង្វះថវិកា បន្ទាប់​ពីសហរដ្ឋអាមេរិក​​ប្រកាស​ផ្តាច់ជំនួយ​​ពីកម្មវិធី​ជាច្រើន​​របស់​​អង្គការសហប្រជាជាតិ​។

WFP កំពុងត្រូវបានបង្ខំឱ្យបញ្ឈប់ការព្យាបាលសម្រាប់ស្ត្រី និងកុមារដែលខ្វះអាហារូបត្ថម្ភចំនួន ៦៥០០០០នាក់ នៅក្នុងខែឧសភា ដោយសារតែមូលនិធិមិនគ្រប់គ្រាន់។ ទីភ្នាក់ងារអង្គការសហប្រជាជាតិនេះ បានព្រមានកាលពីថ្ងៃអង្គារថា ប្រជាជន ៣.៦ លាននាក់នៅក្នុងប្រទេសអេត្យូពីនឹងមានមានហានិភ័យបាត់បង់សិទ្ធិទទួលបានជំនួយស្បៀងអាហារក្នុងប៉ុន្មានសប្តាហ៍ខាងមុខនេះ លុះត្រាតែមានជំនួយហិរញ្ញវត្ថុថ្មី។

លើសពីនេះទីភ្នាក់ងារនេះបានព្រមានថាជំនួយជាសាច់ប្រាក់ និងអាហារសម្រាប់ជនភៀសខ្លួនរហូតដល់មួយលាននាក់នឹងផ្អាកនៅខែមិថុនា ប្រសិនបើមិនទទួលបានមូលនិធិបន្ថែម។

​បើតាមទីភ្នាក់ងារអង្គការសហប្រជាជាតិ ជម្លោះ អស្ថិរភាព និងគ្រោះរាំងស្ងួតធ្វើឲ្យប្រជាជនអេត្យូពីជាង ១០ លាននាក់នៃប្រជាជន ១៣០ លាននាក់ប្រឈមមុខនឹងការគំរាមកំហែងនៃភាពអត់ឃ្លាន។

គួរបញ្ជាក់ថាដូចទីភ្នាក់ងារផ្តល់ជំនួយជាច្រើន WFP ត្រូវបានជាប់គាំងក្នុងការកាត់បន្ថយការផ្តល់មូលនិធិដែលបង្កើតឡើងដោយរដ្ឋបាលរបស់ប្រធានាធិបតីសហរដ្ឋអាមេរិក Donald Trump ។ ភ្លាមៗបន្ទាប់ពីការចូលកាន់តំណែងរបស់លោកក្នុងខែមករា លោក Trump បានចុះហត្ថលេខាលើបទបញ្ជាប្រតិបត្តិមួយ ដោយបង្កកជំនួយបរទេសទាំងអស់៕

អត្ថបទ៖ ប៊ុន សុភាព