ព័ត៌មានអន្ដរជាតិ

ឃាត់ខ្លួនតម្រួតថៃ ៧ នាក់ ពាក់ព័ន្ធករណីជួញដូរគ្រឿងញៀន

បានផុស

១ year មុន

នៅ

ថ្ងៃអង្គារ ១៨ តុលា ២០២២

ដោយ

ប្រទេសថៃ ៖ តុលាការថៃ បានចេញដីកាចាប់ខ្លួនតម្រួតចំនួន ៧ នាក់ ដែលសុទ្ធសឹងជាមន្ត្រីតម្រួតនៅក្នុងផ្នែកបង្ក្រាបគ្រឿងញៀន បន្ទាប់ពីរកឃើញថា មានការពាក់ព័ន្ធនឹងការចុះបង្ក្រាបរួចហើយ យកវត្ថុតាងលាក់ទុក ដើម្បីជួញដូរបន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឃាត់ខ្លួននេះបានធ្វើឡើងកាលពីល្ងាចថ្ងៃទី ១៧ ខែតុលា ឆ្នាំ ២០២២ នៅក្នុងស្ថានីយតម្រួត បវរមង្គល នាទីក្រុងបាងកក ប្រទេសថៃ។ ផ្អែកលើចម្លើយសារភាពរបស់ជនសង្ស័យមួយរូប ក្រោយពីសមត្ថកិច្ចចុះបង្ក្រាបករណីជួញដូរគ្រឿងញៀនមួយកន្លែង បានឲ្យដឹងថា រូបគេបានទិញពី (ភូកង ប៊ីន)។

ក្រោយពីបានស្រាវជ្រាវរួចមកទើបដឹងថា ភូកង ប៊ីន គឺជាតម្រួតមួយរូប មានតួនាទីជានាយផ្នែកបង្ក្រាបគ្រឿងញៀន នៅក្នុងស្ថានីយតម្រួត បវរមង្គល ក្នុងទីក្រុងបាងកក។

តាមការលើកឡើងពីលោកអធិការ បញ្ជាក់ថា កាលពីថ្ងៃទី ១០ កុម្ភៈកន្លងទៅនេះ ក្រុមរបស់លោក ប៊ីន បានចុះបង្ក្រាបករណីគ្រឿងញៀននៅក្នុងខន់ដូ មួយកន្លែង ប៉ុន្តែលោកមិនបានទទួលនូវសេចក្ដីរាយការណ៍អំពីវត្ថុតាងដែលត្រូវដកហូតនោះឡើយ មានន័យថា ពួកគេបង្ក្រាបបានហើយប៉ុន្តែលាក់ទុកវត្ថុតាងទាំងអស់ដើម្បីចែកចាយវិញ។

នៅពេលកម្លាំងជំនាញចុះឆែកឆេរក្នុងបន្ទប់របស់ ភូកង ប៊ីន គឺបានរកឃើញសាក់កាដូមួយ ដែលក្នុងនោះមាន ថ្នាំញៀនប្រភេទយ៉ាម៉ាចំនួន ១៣.០០០ គ្រាប់ ថ្នាំញៀនប្រភេទទឹកកក ១០០ ក្រាម និង ថ្នាំញៀនប្រភេទគ្រវី K មួយចំនួនថែមទៀត។

លោកអធិការបានបន្ថែមថា សរុបមន្ត្រីតម្រួតដែលពាក់ព័ន្ធមានចំនួន ៧ នាក់ ដោយបច្ចុប្បន្ន តុលាការ បានចេញដីកាចាប់ខ្លួនហើយ។ ប៉ុន្តែក្នុងចំណោមមន្ត្រីទាំង ៧ រូប មានម្នាក់ រត់គេចខ្លួនហើយ ហើយលោកក៏មិនអាចទទួលយកបានដែរចំពោះមន្ត្រីតម្រួតណាដែលមានការពាក់ព័ន្ធនឹងសារធាតុញៀន៕

អត្ថបទ ៖ សោ និយមរ័ត្ន