អាមេរិក ថា ចិន កំពុងពន្លឿនផែនការបង្រួបបង្រួមជាមួយ កោះតៃវ៉ាន់ (មានវីដេអូ)

រដ្ឋមន្ត្រីការបរទេសអាមេរិក លោក Antony Blinken បាននិយាយថា ប្រទេសចិន កំពុងបន្តគោលដៅបង្រួបបង្រួមជាមួយកោះតៃវ៉ាន់ ក្នុងពេលវេលាលឿនជាងការរំពឹងទុកពីមុន។

លោក​​និយាយ​ថា ទីក្រុង​ប៉េកាំង ​បាន​សម្រេច​ចិត្ត​ថា ​ស្ថានការណ៍ជាក់ស្តែងនាពេល​បច្ចុប្បន្ន​ លែង​អាច​ទទួល​យក​បាន​ទៀតហើយ។

ក្នុងសុន្ទរកថាបើកសមាជបក្សកុម្មុយនិស្ត នៅទីក្រុងប៉េកាំង កាលពីថ្ងៃអាទិត្យទី១៧ខែតុលា ប្រធានាធិបតីចិនលោក Xi Jinping បានបដិសេធច្រានចោលការប្រើកម្លាំង ដើម្បីបង្រួបបង្រួមជាមួយកោះតៃវ៉ាន់។

កាលពីខែមុន ប្រធានាធិបតីអាមេរិក លោក Joe Biden និយាយថា កងកម្លាំងអាមេរិកនឹងការពារកោះតៃវ៉ាន់ នៅក្នុងព្រឹត្តិការណ៍នៃការវាយប្រហាររបស់ចិន បើទោះបីជាគោលនយោបាយផ្លូវការរបស់សហរដ្ឋអាមេរិក មានអត្ថន័យមិនច្បាស់លាស់លើបញ្ហានេះក៏ដោយ។

ថ្លែងក្នុងព្រឹត្តិការណ៍មួយនៅសាកលវិទ្យាល័យ Stanford កាលពីថ្ងៃអង្គារទី១៨ខែតុលា លោក Blinken បានលើកឡើងថា ប្រសិនបើទីក្រុងប៉េកាំង មិនអាចសម្រេចបាននូវការបង្រួបបង្រួមដោយសន្តិភាពទេនោះ ចិននឹងប្រើការបង្ខិតបង្ខំ និងអាចប្រើកម្លាំង។ នោះ​គឺ​ជា​អ្វី​ដែល​រំខាន​យ៉ាង​ខ្លាំង​ដល់​ស្ថានភាពនាពេល​បច្ចុប្បន្ន និង​បង្កើត​ភាព​តានតឹង​យ៉ាង​ខ្លាំង។

លោក Blinken បន្ថែមថា សហរដ្ឋអាមេរិកនឹងគោរពការប្តេជ្ញាចិត្តរបស់ខ្លួនចំពោះកោះតៃវ៉ាន់ ហើយគាំទ្រសមត្ថភាពរបស់កោះនេះក្នុងការការពារខ្លួន។

គួរបញ្ជាក់ថា គោលនយោបាយផ្លូវការរបស់អាមេរិក មិនប្តេជ្ញាចំពោះសកម្មភាពយោធាលើកោះតៃវ៉ាន់ទេ ប៉ុន្តែលោកប្រធានាធិបតី Biden ហាក់ដូចជាបានប្រឆាំងនឹងជំហរនេះ ដោយសង្កត់ធ្ងន់ម្តងហើយម្តងទៀតថា ទីក្រុងវ៉ាស៊ីនតោននឹងការពារកោះតៃវ៉ាន់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ តៃវ៉ាន់ ថា ចិន កំពុង សម្លឹង មើល សង្រ្គាម អ៊ុយក្រែន ដើម្បី អភិវឌ្ឍ យុទ្ធសាស្ត្រ “កូនកាត់”