លោក Zelensky ឲ្យអឺរ៉ុបពន្លឿនការដឹកជញ្ជូនប្រព័ន្ធការពារដែនអាកាសដល់ អ៊ុយក្រែន

ប្រធានាធិបតីអ៊ុយក្រែនលោក Volodymyr Zelensky បានជំរុញឲ្យសហភាពអឺរ៉ុប (EU) បង្កើនល្បឿនការដឹកជញ្ជូនប្រព័ន្ធការពារដែនអាកាស បន្ទាប់ពីជិតមួយភាគបីនៃស្ថានីយ៍ថាមពលរបស់ប្រទេសត្រូវបានបំផ្លាញនៅក្នុងការវាយប្រហាររបស់រុស្ស៊ី ។

នៅក្នុងសុន្ទរកថាតាមវីដេអូទៅកាន់កិច្ចប្រជុំមេដឹកនាំសហភាពអឺរ៉ុបនៅទីក្រុងប្រ៊ុចសែលកាលពីថ្ងៃព្រហស្បតិ៍ លោក Volodymyr Zelensky បាននិយាយថា លោកបានស្នើឲ្យមេដឹកនាំអឺរ៉ុបពន្លឿនការអនុវត្តដំណោះស្រាយក្នុងរឿងនេះឲ្យបានច្រើនតាមដែលអាចធ្វើទៅបាន ។

លោក Zelensky បញ្ជាក់ថា រុស្ស៊ីកំពុងប្រើប្រាស់ថាមពលជាអាវុធប្រឆាំងនឹងអឺរ៉ុប ដូច្នេះការពន្លឿននៃការបញ្ជូនប្រព័ន្ធការពារដែនអាកាសដល់អ៊ុយក្រែន គឺជាការការពារអឺរ៉ុបផងដែរ ។

ប្រធានាធិបតីអ៊ុយក្រែនរូបនេះបាននិយាយទៀតថា ការវាយប្រហាររបស់រុស្ស៊ីទៅលើតំបន់ភាគច្រើនរបស់អ៊ុយក្រែននាពេលថ្មីៗនេះ គឺជាការចេតនាចាប់ផ្ដើមរារាំងអ៊ុយក្រែនមិនឲ្យនាំចេញថាមពលទៅកាន់សហភាពអឺរ៉ុប ។

ជាចុងក្រោយលោក Zelensky បានគូសបញ្ជាក់ថា ការវាយប្រហារដោយកាំជ្រួចមីស៊ីលនាំផ្លូវរបស់រុស្ស៊ី និងយន្តហោះគ្មានមនុស្សបើក (ដ្រូន) ដែលផលិតដោយអ៊ីរ៉ង់ បានបំផ្លាញហេដ្ឋារចនាសម្ព័ន្ធថាមពលច្រើនជាងមួយភាគបីរបស់ប្រទេស ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ​៖ អាមេរិក អាចបញ្ចប់ការផ្ដល់ជំនួយឲ្យ អ៊ុយក្រែន បើរឿងទាំងនេះកើតឡើង