លោក Boris Johnson ឆ្លើយបែបណារឿងឈរឈ្មោះជានាយករដ្ឋមន្ត្រី អង់គ្លេស សាថ្មី

សារព័ត៌មាន BBC និងប្រព័ន្ធផ្សព្វផ្សាយផ្សេងទៀតក្នុងប្រទេសអង់គ្លេសរាយការណ៍ថា អតីតនាយករដ្ឋមន្ត្រីអង់គ្លេសលោក Boris Johnson នឹងមិនឈរឈ្មោះក្នុងការបោះឆ្នោតជ្រើសរើសជាប្រធានគណបក្សអភិរក្សដើម្បីធ្វើជាអ្នកស្នងតំណែងនាយករដ្ឋមន្ត្រីលោកស្រី Liz Truss នោះទេ ។

លោក Johnson ដែលបានចាកចេញពីតំណែងកាលពីខែមុន បន្ទាប់ពីរឿងអាស្រូវជាបន្តបន្ទាប់ បាននិយាយនៅក្នុងសេចក្តីថ្លែងការណ៍មួយថា “វានឹងមិនមែនជារឿងត្រឹមត្រូវទេ ដែលត្រូវដាក់សំណើឈរឈ្មោះសាជាថ្មី ព្រោះវានឹងបែងចែកគណបក្សរបស់គាត់” ។

លោក Johnson បាននិយាយទៀតថា “អ្នកមិនអាចគ្រប់គ្រងប្រកបដោយប្រសិទ្ធភាពបានទេ លុះត្រាតែអ្នកមានគណបក្សរួបរួមនៅក្នុងសភា ។ អ្វីដែលល្អបំផុតដែលខ្ញុំអាចធ្វើបាននោះគឺ មិនត្រូវអនុញ្ញាតឲ្យមានការតែងតាំងខ្ញុំឡើយ” ។

ស្របពេលជាមួយគ្នានេះ អតីតរដ្ឋមន្ត្រីហិរញ្ញវត្ថុលោក Rishi Sunak និងមេដឹកនាំសភា Penny Mordaunt គឺជាបេក្ខភាព ២ នាក់រូបដែលបញ្ជាក់ថា កំពុងឈរឈ្មោះរហូតមកដល់ពេលនេះ ។

គួរបញ្ជាក់ថា លោកស្រី Liz Truss បានលាលែងពីតំណែងនាយករដ្ឋមន្ត្រីអង់គ្លេសកាលពីថ្ងៃទី ២០ ខែតុលា បន្ទាប់ពីកាន់កាប់តំណែងមួយនេះត្រឹមតែរយៈពេល ៦ សប្ដាហ៍ ឬ ៤៤ ថ្ងៃប៉ុណ្ណោះ ហើយលោកស្រីក៏ជានាយករដ្ឋមន្ត្រីអង់គ្លេសដែលកាន់តំណែងបានខ្លីបំផុតក្នុងប្រវត្តិសាស្ត្រនយោបាយសម័យទំនើបនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក ស៊ី ជីនពីង ជាប់ឆ្នោតជាប្រធានបក្សកុម្មុយនិស្ត ចិន អាណត្តិទី ៣