មិនខ្វល់រឿង អាមេរិក ព្រមាន, កូរ៉េខាងជើង បាញ់មីស៊ីលផ្លោង ៣ គ្រាប់ទៀត

យោធាកូរ៉េខាងត្បូងនិយាយថា កូរ៉េខាងជើងបានបាញ់មីស៊ីលផ្លោងរយៈចម្ងាយខ្លីចំនួន ៣ គ្រាប់បន្ថែមទៀតឆ្ពោះទៅកាន់សមុទ្រខាងកើតកាលពីយប់ថ្ងៃព្រហស្បតិ៍ ពោលប្រហែលមួយម៉ោង បន្ទាប់ពីទីក្រុងព្យុងយ៉ាងបានថ្កោលទោសការសម្រេចចិត្តរបស់ទីក្រុងសេអ៊ូល និងទីក្រុងវ៉ាស៊ីនតោន ក្នុងការបន្តសមយុទ្ធដែនអាកាសរួមគ្នា ថាជា “ជម្រើសខុស និងគ្រោះថ្នាក់” ។

បើ​យោង​តាម​អគ្គសេនាធិការ​រួម​របស់​កូរ៉េ​ខាង​ត្បូង (JCS) បានឲ្យដឹងថា កាំជ្រួចមីស៊ីល​ត្រូវ​បាន​បាញ់​ចេញ​ពី​ទីក្រុង Koksan ក្នុង​ខេត្ត North Hwanghae ​នៅ​ម៉ោង​ប្រហែល ៩ និង ៣៥ នាទីយប់ ​ ខណៈកាលពីពេលព្រឹកថ្ងៃដដែលនោះ កូរ៉េខាងជើងបានបាញ់មីស៊ីលផ្លោងអន្តរទ្វីប (ICBM) មួយគ្រាប់ និងមីស៊ីលផ្លោងរយៈចម្ងាយខ្លីចំនួន ២ គ្រាប់ផងដែរ ។

ការបាញ់មីស៊ីលរបស់កូរ៉េខាងជើងបានកើតឡើង បន្ទាប់ពីរដ្ឋមន្ត្រីការពារជាតិអាមេរិកលោក Lloyd Austin បាននិយាយក្នុងអំឡុងកិច្ចប្រជុំ ជាមួយសមភាគីកូរ៉េខាងត្បូងកាលពីថ្ងៃព្រហស្បតិ៍ថា ការវាយប្រហារនុយក្លេអ៊ែរណាមួយ របស់កូរ៉េខាងជើងប្រឆាំងសហរដ្ឋអាមេរិក ឬប្រទេសផ្សេងទៀតនឹង នាំឲ្យរបបលោកលោក គីម ជុងអ៊ុន ដល់ទីបញ្ចប់ ។

ស្របពេលជាមួយគ្នានេះ ការបាញ់មីស៊ីលកាលពីយប់ថ្ងៃព្រហស្បតិ៍ ក៏បានកើតឡើងមិនដល់មួយម៉ោងផង បន្ទាប់ពីលោក Pak Jong-chon លេខាធិការនៃគណៈកម្មាធិការកណ្តាល របស់បក្សពលករដែលកំពុងកាន់អំណាចរបស់ប្រទេសកូរ៉េខាងជើង បានចេញសេចក្តីថ្លែងការណ៍មួយ ដោយថ្កោលទោសការសម្រេចរបស់កូរ៉េខាងត្បូង និងសហរដ្ឋអាមេរិកកាលពីពេលកន្លងមក ក្នុងការបន្តសមយុទ្ធដែនអាកាសរួមគ្នាមានឈ្មោះថា “Vigilant Storm” ដែលបានចាប់ផ្តើមកាលពីថ្ងៃចន្ទ ។

ទន្ទឹមនោះ ការបាញ់មីស៊ីលនេះ ក៏ជាការប្រឆាំងរបស់កូរ៉េខាងជើងទៅនឹងការធ្វើសមយុទ្ធ Vigilant Storm ជាសមយុទ្ធដែនអាកាសរួមគ្នាដ៏ធំរបស់សម្ព័ន្ធមិត្ត ដែលពាក់ព័ន្ធនឹងយន្តហោះជាង ២៤០ គ្រឿង រួមទាំងយន្តហោះបំបាំងកាយ នៅលើឧបទ្វីបកូរ៉េ ចំពេលមានការរំពឹងទុកកាន់តែខ្លាំងឡើងថា ទីក្រុងព្យុងយ៉ាងអាចនឹងធ្វើការសាកល្បងនុយក្លេអ៊ែរក្នុងពេលឆាប់ៗនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Yonhap

ចុចអាន ៖ អាមេរិក ព្រមានថា បើកូរ៉េខាងជើង ហ៊ានវាយប្រហារនុយក្លេអ៊ែរ របបលោក គីម នឹងត្រូវបញ្ចប់