ចិន បង្អួតមីស៊ីលល្បឿនលឿនជាងសំឡេងប្រភេទចុងក្រោយបំផុតទៅ អាមេរិក

កាសែត South China Morning Post បានរាយការណ៍ថា ប្រទេសចិនបានបង្ហាញកាំជ្រួចមីស៊ីលល្បឿនលឿនជាងសំឡេងប្រឆាំងនាវា ប្រភេទចុងក្រោយបំផុតរបស់ខ្លួនឈ្មោះ YJ-21 ដល់សាធារណជនជាលើកដំបូងនៅក្នុងបទបង្ហាញលើអាកាសកាលពីថ្ងៃអង្គារ ។

ទន្ទឹមនោះ ការបង្ហាញនៃមីស៊ីលនេះត្រូវបានគេមើលឃើញថា ជាសារមួយផ្ញើទៅកាន់សហរដ្ឋអាមេរិក ចំពេលមានភាពតានតឹងកាន់តែខ្លាំងជាមួយទីក្រុងវ៉ាស៊ីនតោនជុំវិញកោះតៃវ៉ាន់ ។

កាសែត SCMP បានរាយការណ៍ទៀតថា មីស៊ីល 2PZD-21 ចំនួន ២ គ្រាប់ត្រូវបានគេឃើញនៅក្រោមស្លាបរបស់យន្តហោះទម្លាក់គ្រាប់បែកយុទ្ធសាស្ត្រ Xian H-6K នៅឯការបើកកម្មវិធី Airshow China នៅទីក្រុងឆ្នេរសមុទ្រ Zhuhai ខណៈមីស៊ីល YJ-21 ក៏ត្រូវបានគេមើលឃើញផងដែរ នៅក្នុងវីដេអូបាញ់សាកល្បងចេញពីនាវាពិឃាតរបស់កងទ័ពជើងទឹករំដោះប្រជាជនចិន ។

ស្របពេលជាមួយគ្នានេះ លោកប្រធានាធិបតី ស៊ី ជីនពីង ក៏បានអំពាវនាវនៅក្នុងកម្មវិធី Airshow China ផងដែរថា “សូមកងទ័ពរំដោះប្រជាជនចិនត្រៀមខ្លួនដើម្បីការពារយ៉ាងម៉ឺងម៉ាត់នូវអធិបតេយ្យភាពជាតិ សន្តិសុខ និងផលប្រយោជន៍អភិវឌ្ឍន៍ ជាពិសេសដើម្បីឆ្លើយតបទៅនឹងការគំរាមកំហែងផ្នែកសន្តិសុខ ដែលកើតចេញពីយុគសម័យថ្មីនៃភាពចលាចលពិភពលោក” ។

ជាចុងក្រោយលោក ស៊ី បាននិយាយថា កងទ័ពរំដោះប្រជាជនត្រូវតែហ្វឹកហ្វឺនកាន់តែខ្លាំង ដើម្បីត្រៀមខ្លួនសម្រាប់ការប្រយុទ្ធ ដោយសារតែពិភពលោក​កំពុង​មាន​ការ​ផ្លាស់ប្តូរ ដែលយើងមិនធ្លាប់ឃើញ​ក្នុង​មួយ​សតវត្ស​នេះ ហើយបច្ចុប្បន្ននេះពិភពលោកកំពុង​បង្កើន​អស្ថិរភាព និង​ភាព​មិន​ប្រាកដប្រជា ក៏ដូចជា​ប៉ះពាល់​ដល់​សន្តិសុខ​ជាតិផងដែរ ​៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ អាមេរិក ប្រាប់ផែនការ បើ កូរ៉េខាងជើង សាកល្បងនុយក្លេអ៊ែរ