រុស្ស៊ី ព្រមានបញ្ជូនប្រទេសអ៊ុយក្រែន  ឲ្យវិលទៅសតវត្សរ៍ទី១៨វិញ 

លោក វ្ល៉ាឌីមៀរ ពូទីន នឹងបញ្ជូនប្រទេសអ៊ុយក្រែន ឲ្យវិលត្រលប់ទៅសតវត្សរ៍ទី១៨វិញ ដោយជំរុញការវាយប្រហារ លើរោងចក្រថាមពលរបស់ប្រទេសនេះ។ នេះបើតាមការព្រមានពីសម្ព័ន្ធមិត្តកំពូលម្នាក់របស់លោក ពូទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Pyotr Tolstoy ដែលជាអនុប្រធានសភារុស្ស៊ី បានព្រមានថា ទីក្រុងមូស្គូនឹងមិនផ្អាកការវាយប្រហាររបស់ខ្លួន លើស្ថានីយថាមពលអ៊ុយក្រែន មុនរដូវរងានោះទេ។

សមាជិកនៃគណបក្ស United Russia របស់លោកពូទីនរូបនេះ បានប្រកាសថា “ហេដ្ឋារចនាសម្ព័ន្ធរបស់អ៊ុយក្រែននឹងត្រូវបំផ្លាញ ហើយប្រទេសអ៊ុយក្រែននឹងត្រូវបញ្ជូនត្រលប់ទៅសតវត្សរ៍ទី១៨វិញ”។

លោកបានប្រាប់ទូរទស្សន៍បារាំង BFM ថា ប្រទេសលោកខាងលិច គួរតែរៀបចំខ្លួនសម្រាប់សង្រ្គាមដែលនឹងអូសបន្លាយពេលរយៈពេលច្រើនឆ្នាំ។ ប៉ុន្តែ​អន្តរាគមន៍​ដ៏​ចម្លែក​របស់​លោក Tolstoy ហាក់​មាន​ភាព​ផ្ទុយ​គ្នាទៅ​នឹង​សេចក្តី​ថ្លែងការណ៍​របស់​ក្រសួង​ការពារជាតិ​រុស្ស៊ី។

ក្រុមមន្ត្រីនៅទីក្រុងមូស្គូ បានធ្វើការអះអាងទាំងគ្មានមូលដ្ឋានថា ការខូចខាតដល់ហេដ្ឋារចនាសម្ព័ន្ធសំខាន់ៗរបស់រដ្ឋធានីអ៊ុយក្រែន គឺបណ្តាលមកពីខែលការពារមីស៊ីលបរទេស និងអ៊ុយក្រែន។

ចាប់តាំងពីដើមខែតុលាមក រុស្ស៊ីបានបាញ់មីស៊ីល និងបញ្ជូនយន្តហោះគ្មានមនុស្សបើកផលិតដោយអ៊ីរ៉ង់ ទៅកាន់គោលដៅថាមពលនៅទូទាំងប្រទេសអ៊ុយក្រែន ដើម្បីផ្តាច់បណ្តាញថាមពលរបស់ខ្លួន ខណៈសីតុណ្ហភាពធ្លាក់ចុះក្រោមសូន្យអង្សាសេ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី គំរាម ឈប់ផ្គត់ផ្គង់ប្រេងដល់ប្រទេសណា ដែលកំណត់តម្លៃ