ហ្វីលីពីន បញ្ជាឲ្យមន្ត្រីប៉ូលិសពាក់សក្ដិធំៗ ជាប់ពាក់ព័ន្ធការជួញដូរគ្រឿង​ញៀន លាលែងពីតំណែង

រដ្ឋមន្ត្រីក្រសួងមហាផ្ទៃហ្វីលីពីនបានជំរុញឲ្យក្រុមមន្ត្រីប៉ូលិសជាន់ខ្ពស់រាប់រយនាក់លាលែងពីតំណែង ខណៈដែលរដ្ឋាភិបាលរបស់លោកប្រធានាធិបតី Ferdinand Marcos Jr កំពុងខិតខំប្រឹងប្រែងបោសសម្អាតកងកម្លាំងដែលពុករលួយពាក់ព័ន្ធក្នុងការជួញដូរគ្រឿងញៀនខុសច្បាប់ ។

កាលពីថ្ងៃពុធ រដ្ឋមន្ត្រីក្រសួងមហាផ្ទៃហ្វីលីពីនលោក Benjamin Abalos បានជំរុញឲ្យមន្ត្រីប៉ូលិសជាន់ខ្ពស់ដែលមានឋានន្តរសក្ដិ ចាប់ពីថា្នក់វរសេនីយឯក រហូតដល់ថ្នាក់ឧត្តមសេនីយ៍ប្រហែល ៣០០ នាក់ ក្នុងចំណោមកងកម្លាំងប្រមាណ ២២៧,០០០ នាក់ ធ្វើការសម្រេចចិត្តដោយខ្លួនឯង បន្ទាប់ពីការស៊ើបអង្កេតបានរកឃើញថា ពួកគេមួយក្តាប់តូចពាក់ព័ន្ធនឹងការជួញដូរគ្រឿងញៀន ។

នៅពេលត្រូវបានសួរដោយអ្នកសារព័ត៌មានពាក់ព័ន្ធនឹងបញ្ហានេះ, លោកវរសេនីយ៍ឯក Redrico Maranan ប្រធានផ្នែកព័ត៌មានសាធារណៈរបស់កងកម្លាំងហ្វីលីពីនបានប្រាប់អ្នកយកព័ត៌មានថា “ក្រុមមន្រ្តីប៉ូលិសទាំងអស់នឹងធ្វើតាមការសម្រេចចិត្តរបស់ថ្នាក់ដឹកនាំនយោបាយ ពីព្រោះលោកជឿថា អ្វីៗទាំងអស់នេះជាប្រយោជន៍ល្អដល់ស្ថាប័នរបស់យើង” ។

គួរបញ្ជាក់ថា អតីតប្រធានាធិបតីហ្វីលីពីនលោក Rodrigo Duterte បានអនុវត្តយុទ្ធនាការបង្ក្រាបការជួញដូរគ្រឿងញៀន ចាប់តាំងពីលោកឡើងកាន់តំណែងកាលពីឆ្នាំ ២០១៦ ខណៈយោងទៅតាមទិន្នន័យរបស់ប៉ូលិសជាតិបានឲ្យដឹងថា យុទ្ធនាការបង្រ្កាបនេះធ្វើឲ្យជនសង្ស័យគ្រឿនញៀនជាង ៦,២០០ នាក់បានស្លាប់ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ មេ WHO សង្ឃឹមថា កូវីដ នឹងរលាយបាត់នៅឆ្នាំ ២០២៣ នេះ