នៅថ្ងៃចន្ទទី៣០ខែមករា អគ្គលេខាធិការអង្គការណាតូ លោក Jens Stoltenberg បានជំរុញឲ្យប្រទេសកូរ៉េខាងត្បូង បង្កើនការគាំទ្រផ្នែកយោធាដល់អ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Stoltenberg កំពុងស្ថិតនៅក្នុងទីក្រុងសេអ៊ូល ជាកន្លែងឈប់លើកដំបូង ក្នុងការធ្វើដំណើរដែលក៏នឹងរួមបញ្ចូលទាំងទៅប្រទេសជប៉ុនផងដែរ ហើយមានគោលបំណងពង្រឹងទំនាក់ទំនងជាមួយសម្ព័ន្ធមិត្តរបស់សហរដ្ឋអាមេរិក ស្របពេលប្រឈមមុខនឹងសង្រ្គាមនៅអ៊ុយក្រែន និងការកើនឡើងនៃការប្រកួតប្រជែងកាន់តែខ្លាំងជាមួយប្រទេសចិន។

ថ្លែងនៅឯវិទ្យាស្ថាន Chey Institute for Advanced Studies ក្នុងទីក្រុងសេអ៊ូល លោក Stoltenberg ក៏បានថ្លែងអំណរគុណដល់ប្រទេសកូរ៉េខាងត្បូងផងដែរ សម្រាប់ជំនួយដែលមិនបង្កគ្រោះថ្នាក់ដល់អ៊ុយក្រែន ប៉ុន្តែបានជំរុញឲ្យទីក្រុងសេអ៊ូលធ្វើបន្ថែមទៀត។

ក្នុងកិច្ចប្រជុំជាមួយមន្ត្រីជាន់ខ្ពស់កូរ៉េខាងត្បូង លោក Stoltenberg អះអាងថា ព្រឹត្តិការណ៍នៅអឺរ៉ុប និងអាមេរិកខាងជើង មានទំនាក់ទំនងអន្តរកម្មជាមួយតំបន់ផ្សេងទៀត ហើយថា សម្ព័ន្ធភាពនេះ ចង់ជួយគ្រប់គ្រងការគំរាមកំហែងជាសកលដោយការបង្កើនភាពជាដៃគូនៅអាស៊ី។

គួរបញ្ជាក់ថា ប្រទេសកូរ៉េខាងត្បូង បានចុះហត្ថលេខាលើកិច្ចព្រមព្រៀងសំខាន់ៗ ដែលផ្តល់រថក្រោះ យន្តហោះ និងសព្វាវុធរាប់រយគ្រឿង ដល់សមាជិកណាតូគឺប្រទេសប៉ូឡូញ ចាប់តាំងពីសង្គ្រាមបានផ្ទុះឡើង ប៉ុន្តែប្រធានាធិបតីកូរ៉េខាងត្បូងលោក Yoon Suk-yeol និយាយថា ច្បាប់របស់ប្រទេស គឺប្រឆាំងនឹងការផ្តល់អាវុធដល់ប្រទេសដែលមានជម្លោះ ដែលនេះជាហេតុធ្វើឲ្យការផ្តល់អាវុធដល់អ៊ុយក្រែន ជួបផលលំបាក៕

ប្រែសម្រួល៖ Vann Vann

ប្រភព៖ CNA

ចុចអាន៖ ណាតូ ប្រកាសត្រៀមខ្លួនរួចស្រេចអស់ហើយ សម្រាប់ការប្រឈមមុខដាក់គ្នាដោយផ្ទាល់ជាមួយ រុស្ស៊ី