ចិន ចង់បានបាឡុងរបស់ខ្លួន មកវិញ (មានវីដេអូ)

ក្រសួងការបរទេសចិន បានស្នើសុំឲ្យរដ្ឋបាលរបស់លោកប្រធានាធិបតី ចូ បៃដិន ប្រគល់មកវិញនូវកម្ទេចកម្ទីនៃបាឡុង ដែលយោធាអាមេរិកបាញ់ទម្លាក់នៅឆ្នេរសមុទ្រភាគខាងកើតអាមេរិកកាលពីថ្ងៃអាទិត្យទី០៥ខែកុម្ភៈ ដោយនិយាយថា បាឡុងនេះជាកម្មសិទ្ធិរបស់ចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទសារព័ត៌មានមួយកាលពីថ្ងៃអង្គារទី០៧ខែកុម្ភៈ អ្នកនាំពាក្យក្រសួងលោកស្រី Mao Ning ត្រូវបានសួរថាតើទីក្រុងប៉េកាំងបានស្នើសុំយកកម្ទេចកម្ទីបាឡុងមកវិញដែរឬទេ? លោកស្រី​បានឆ្លើយតប​ថា “​បាឡុងនោះ​មិន​មែន​ជា​របស់​អាមេរិក​ទេ។ វាជាកម្មសិទ្ធិរបស់ចិន”។

ការអត្ថាធិប្បាយរបស់លោកស្រី Ning បានកើតឡើងបីថ្ងៃ បន្ទាប់ពីយន្តហោះចម្បាំងអាមេរិក បាញ់ទម្លាក់បាឡុង នៅឯឆ្នេរសមុទ្រនៃរដ្ឋ South Carolina ដោយមន្ត្រីអាមេរិកចោទប្រកាន់ថា វាជាយានចារកម្ម។

មន្ទីរបញ្ចកោណអះអាងថា ខ្លួនបានរកឃើញបាឡុងកាលពីថ្ងៃពុធសប្តាហ៍មុន។ យ៉ាងណាក្តី លោក បៃដិន បានប្រឈមមុខនឹងការរិះគន់យ៉ាងខ្លាំងក្លា ចំពោះការអនុញ្ញាតឲ្យបាឡុងហោះឆ្លងទ្វីប ដោយឆ្លងកាត់ទាំងទីតាំងមីស៊ីលនុយក្លេអ៊ែរ និងទីតាំងយោធាដ៏រសើបផ្សេងទៀតផងដែរ មុនពេលបាញ់ទម្លាក់។

ក្រសួងការបរទេសចិនបាននិយាយកាលពីថ្ងៃសុក្រថា បាឡុងនេះគឺជាយានស្រាវជ្រាវឧតុនិយមស៊ីវិល ដែលបានចូលដែនអាកាសអាមេរិកដោយអចេតនា បន្ទាប់ពីវង្វេងផ្លូវ។

យោងតាមលោកស្រី Ning, អ្នកនយោបាយ និងប្រព័ន្ធផ្សព្វផ្សាយរបស់សហរដ្ឋអាមេរិកមួយចំនួនបានបំភាន់ឧប្បត្តិហេតុនេះ ដើម្បីវាយប្រហារ និងលាបពណ៌ចិន។ ទោះបីជាយ៉ាងណាក៏ដោយ លោកស្រី​បាន​បដិសេធ​​ផ្តល់​ព័ត៌មាន​លម្អិត​បន្ថែម​ទៀត​អំពីបាឡុងនោះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ចិន ថា អាមេរិក ប្រតិកម្មជ្រុលហួសហេតុ និងធ្វើឲ្យខូចទំនាក់ទំនង ដោយសាររឿង បាឡុង