ចិន ថា អាមេរិក ប្រតិកម្មជ្រុលហួសហេតុពេក និងធ្វើឲ្យខូចទំនាក់ទំនង ដោយសាររឿង បាឡុង (មានវីដេអូ)

ក្រសួងការបរទេសទីក្រុងប៉េកាំង បាននិយាយកាលពីថ្ងៃចន្ទទី០៦ខែកុម្ភៈថា ការសម្រេចចិត្តរបស់ទីក្រុងវ៉ាស៊ីនតោន ក្នុងការបាញ់ទម្លាក់បាឡុងរបស់ចិនដែលហោះចូលទៅក្នុងដែនអាកាសសហរដ្ឋអាមេរិកកាលពីសប្តាហ៍មុន គឺធ្វើឲ្យប៉ះពាល់ដល់ទំនាក់ទំនងការទូតរវាងប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងអះអាងថា “ដោយសារតែការសម្រេចចិត្តបំផ្លាញបាឡុងដែលចិនហៅថាជា យានអាកាសគ្មានមនុស្សបើករបស់ស៊ីវិល, សហរដ្ឋអាមេរិកបានបញ្ចេញប្រតិកម្មខ្លាំងពេកហើយ និងបានរំលោភយ៉ាងធ្ងន់ធ្ងរដល់ស្មារតីនៃច្បាប់អន្តរជាតិ និងការអនុវត្តអន្តរជាតិ”។

ដោយសំដៅទៅកិច្ចពិភាក្សាខែវិច្ឆិកាឆ្នាំ២០២២រវាងប្រធានាធិបតីអាមេរិក ចូ បៃដិន និងមេដឹកនាំចិន ស៊ី ជីនពីង ក្នុងកិច្ចប្រជុំកំពូល G20 នៅប្រទេសឥណ្ឌូណេស៊ី, ក្រសួងបានលើកឡើងថា “អ្វីដែលសហរដ្ឋអាមេរិកធ្វើ បានប៉ះពាល់យ៉ាងធ្ងន់ធ្ងរ និងធ្វើឲ្យខូចខាតដល់កិច្ចខិតខំប្រឹងប្រែង និងវឌ្ឍនភាពរបស់ភាគីទាំងសងខាង ក្នុងស្ថិរភាពទំនាក់ទំនងចិន-អាមេរិក ចាប់តាំងពីកិច្ចប្រជុំនៅកោះបាលីមក”។

ប្រទេសចិនសូមប្រឆាំងដាច់ខាតនិងតវ៉ាយ៉ាងម៉ឺងម៉ាត់ ចំពោះការឆ្លើយតបរបស់ទីក្រុងវ៉ាស៊ីនតោន ទៅនឹងឧបទ្ទវហេតុបាឡុងហើយជំរុញឲ្យសហរដ្ឋអាមេរិកកុំចាត់វិធានការបន្ថែមទៀតដែលធ្វើឲ្យប៉ះពាល់ដល់ផលប្រយោជន៍របស់ចិន និងកុំឲ្យបង្កើន ឬពង្រីកភាពតានតឹង”។

ក្រសួងក៏បានរំលឹកឡើងវិញផងដែរថា បាឡុងចិន បានវង្វេងចូលទៅក្នុងដែនអាកាសអាមេរិក ដោយសារគ្រោះថ្នាក់ និងឧបទ្ទវហេតុដែលបង្កឡើងដោយកាលៈទេសៈមិនអាចទាយទុកជាមុនបាន ប៉ុន្តែថា ទីក្រុងវ៉ាស៊ីនតោន ធ្វើមិនដឹងមិនឮចំពោះរឿងទាំងនេះ ហើយប្រើប្រាស់កម្លាំងដោយមិនរើសមុខប្រឆាំងនឹងបាឡុងស៊ីវិល​ដែល​ហៀប​នឹង​ចាក​ចេញ​ពី​ដែន​អាកាស​អាមេរិកទៅហើយ។

គួរបញ្ជាក់ជាថ្មី ឧបទ្ទវហេតុនេះបានចាប់ផ្តើមកាលពីថ្ងៃព្រហស្បតិ៍សប្តាហ៍មុន នៅពេលមន្ទីរបញ្ចកោណនិយាយថា ខ្លួនកំពុងតាមដានបាឡុងចារកម្មចិននៅលើរដ្ឋ ម៉ុនតាណា។

កាលពីថ្ងៃអាទិត្យ បាឡុងត្រូវបានទម្លាក់ដោយយន្តហោះចម្បាំង F-22 នៅឯឆ្នេរសមុទ្រនៃរដ្ឋ South Carolina។ យោងតាមរដ្ឋមន្ត្រីការពារជាតិអាមេរិកលោក Lloyd Austin, បាឡុងត្រូវបានប្រើប្រាស់ដោយប្រទេសចិន ក្នុងការប៉ុនប៉ងដើម្បីឃ្លាំមើលទីតាំងយុទ្ធសាស្ត្រនៅអាមេរិក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ចិន បណ្តេញប្រធានសេវាអាកាសធាតុជាតិ ចេញពីតំណែង ក្រោយបាឡុងហោះចូលដែនអាកាសអាមេរិក