តាមពិតយន្តហោះ Boeing ដែលធ្លាក់ក្នុងឥណ្ឌូនេស៊ីអាក់ខានហោះហើរជិតមួយឆ្នាំមកហើយ

អ្នកមុជទឹករបស់កងទ័ពជើងទឹកឥណ្ឌូនេស៊ីដែលស្វែងរកយន្តហោះនៅបាតមហាសមុទ្រកាលពីថ្ងៃអង្គារបានរកឃើញឧបករណ៍ថតទិន្នន័យហោះហើរពីយន្ដហោះរបស់ក្រុមហ៊ុនអាកាសចរណ៍ Sriwijaya Air ដែលបានធ្លាក់ចូលសមុទ្រកោះ Java ជាមួយនឹងមនុស្ស ៦២ នាក់នៅលើយន្តហោះនោះ ។

ឧបករណ៍នេះត្រូវបានគេរំពឹងថានឹងជួយអ្នកស៊ើបអង្កេតកំណត់នូវអ្វីដែលបណ្តាលឲ្យយន្តហោះ Boeing 737-500 ធ្លាក់ចូលទៅក្នុងមហាសមុទ្រ នៅពេលមានភ្លៀងធ្លាក់យ៉ាងខ្លាំងភ្លាមៗបន្ទាប់ពីហោះចេញពីទីក្រុងហ្សាការតានៅរយៈកម្ពស់ជាង ៣,០០០ ម៉ែត្រកាលពីថ្ងៃសៅរ៍ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមមន្រ្តីបាននិយាយថា យន្តហោះដែលមានអាយុកាល ២៦ ឆ្នាំមួយនេះបានផុតសេវាកម្មហោះហើរ និងមិនបានហោះហើរដឹកអ្នកដំណើរជិត ៩ ខែមកហើយ ដោយសារតែរោគរាតត្បាតនៃជំងឺកូវីដ ១៩ ហើយវាបានបន្តការហោះហើរពាណិជ្ជកម្មតិចតួចប៉ុណ្ណោះកាលពីខែធ្នូឆ្នាំមុន ។

យោងតាមទិន្នន័យរបស់ក្រសួងដឹកជញ្ជូនបានឲ្យដឹងថា យន្តហោះនេះមិនបានហោះហើរតាំងពីថ្ងៃទី ២៣ ខែមីនាដល់ថ្ងៃទី ១៩ ខែធ្នូ ។

ដូចនៅក្នុងប្រទេសជាច្រើនដែរឧស្សាហកម្មអាកាសចរណ៍របស់ឥណ្ឌូនេស៊ីបានរងផលប៉ះពាល់យ៉ាងធ្ងន់ធ្ងរដោយជំងឺរាតត្បាតមួយនេះដោយមានការរឹតត្បិតការធ្វើដំណើរ និងការធ្លាក់ចុះយ៉ាងខ្លាំងនៃអ្នកដំណើរ ។

លោក Novie Riyanto អគ្គនាយកដឹកជញ្ជូនតាមផ្លូវអាកាសបាននិយាយនៅក្នុងសេចក្តី​ថ្លែង​ការណ៍​មួយថា រដ្ឋបាលអាកាសចរណ៍សហព័ន្ធអាមេរិកបានផ្ញើសារបញ្ជាមួយដែលតម្រូវឲ្យប្រតិបត្តិករនៃម៉ូដែលយន្ដហោះ Boeing 737 ផ្សេងៗគ្នាក្នុងនោះមានទាំងយន្ដហោះ Boeing 737-500 ត្រូវធ្វើការត្រួតពិនិត្យម៉ាស៊ីនមុនពេលដែលពួកគេអាចហោះហើរម្តងទៀត បន្ទាប់ពីផុតពីសេវាកម្ម ។

លោកបាននិយាយថា យន្ដហោះនេះត្រូវបានត្រួតពិនិត្យនៅថ្ងៃទី ២ ខែធ្នូ រួមទាំងការត្រួតពិនិត្យភាពច្រេះនៃម៉ាស៊ីន ហើយត្រូវបានក្រសួងដឹកជញ្ជូនប្រកាសថាមានលក្ខណៈអំណោយផលនៅថ្ងៃទី ១៤ ខែធ្នូ ។

យោងតាមទិន្នន័យរបស់ក្រសួងបានឲ្យដឹងថា យន្ដហោះនេះបានហោះហើរដំបូងដោយគ្មានដឹកអ្នកដំណើរនៅថ្ងៃទី ១៩ ខែធ្នូ និងបានបន្តការហោះហើរពាណិជ្ជកម្មនៅថ្ងៃទី ២២ ខែធ្នូ ៕

ប្រែសម្រួលដោយ ៖ ជីវ័ន្ត

ប្រភព ៖ CTVNews

ចុចអាន ៖ ឥណ្ឌូនេស៊ីស្រង់បានប្រអប់ខ្មៅពីយន្តហោះដែលធ្លាក់

ចុចអាន ៖ ឥណ្ឌូនេស៊ី បញ្ចេញវីដេអូមួយទៀតអំពីប្រតិបត្តិការរុករកបំណែកយន្តហោះនៅបាតសមុទ្រ