លោក Medvedev ថា ៨០ ឆ្នាំមកនេះ រុស្ស៊ី ជួបពិភពសត្រូវគ្រប់បែបយ៉ាង

អនុប្រធានក្រុមប្រឹក្សាសន្តិសុខរុស្ស៊ីលោក Dmitry Medvedev បាននិយាយនៅក្នុងអត្ថបទមួយថា រុស្ស៊ីកំពុងប្រឈមមុខនឹងពិភពសត្រូវចម្រុះជាថ្មីម្ដងទៀត ក្នុងរយៈពេល ៨០ ឆ្នាំ បន្ទាប់ពីជ័យជម្នះក្នុងសមរភូមិ Stalingrad ។

លោក Medvedev បាន​និយាយ​ថា “មួយឆ្នាំ បន្ទាប់ពីការចាប់ផ្តើមនៃប្រតិបត្តិការសឹករបស់រុស្ស៊ី យើងបានប្រារព្ធកាលបរិច្ឆេទដ៏សំខាន់មួយផ្សេងទៀតក្នុងប្រវត្តិសាស្រ្តរបស់យើងនៅខែកុម្ភៈ ឆ្នាំ ២០២៣ នេះ ហើយនោះគឺជា ខួបលើកទី ៨០ នៃជ័យជម្នះរបស់ប្រជាជនសូវៀតនៅក្នុងសមរភូមិ Stalingrad ដែលជាសមរភូមិដ៏សំខាន់នៃសតវត្សទី ២០” ។

លោក Medvedev បាននិយាយទៀតថា “ប្រវត្តិសាស្ត្ររបស់រុស្ស៊ីបានកើតឡើងម្តងទៀត ។ យើងប្រឈមមុខនឹងចក្រភពទាំងមូលនៃសត្រូវចម្រុះដូចជា អ៊ុយក្រែន, ក្រុម Neo-Nazis អឺរ៉ុប, សហរដ្ឋអាមេរិក, ក្រុម Anglo-Saxons  និងបក្ខពួករបស់ពួកគេផ្សេងទៀតជាដើម” ។

មន្ត្រីសន្តិសុខរូបនេះបានសង្កត់ធ្ងន់ថា ខ្មាំងសត្រូវបានកំណត់ភារកិច្ចកម្ចាត់រុស្ស៊ីចេញពីផែនដី ប៉ុន្តែលោកសូមផ្ដាំទៅវិញថា ការប៉ុនប៉ងរបស់ពួកគេនឹងបរាជ័យ ។ លោកបន្ថែមថា “ពិភពលោកខាងលិច គឺគ្រាន់តែជាផ្នែកតូចមួយនៃសហគមន៍អន្តរជាតិប៉ុណ្ណោះ ពោលមានប្រហែល ១៥ ភាគរយនៃចំនួនប្រជាជននៃភពផែនដី” ។

លោក Medvedev បានចង្អុលបង្ហាញថា “ប្រតិបត្តិការសឹករបស់រុស្ស៊ីនៅអ៊ុយក្រែនកាលពីឆ្នាំមុន បានបង្រៀនរឿងជាច្រើនដល់ជនជាតិរុស្ស៊ី ជាពិសេសបានបង្រួបបង្រួមពលរដ្ឋរបស់ប្រទេសក្នុងការប្រយុទ្ធប្រឆាំងនឹងសត្រូវរួម ហើយទីបំផុតបានជួយកម្ចាត់ការបំភាន់អំពីលទ្ធិប្រជាធិបតេយ្យដែលលោកខាងលិចតែងតែលាក់ពុត និងឆ្កួតលីលា” ។

ជាចុងក្រោយ អនុប្រធានក្រុមប្រឹក្សាសន្តិសុខរុស្ស៊ីរូបនេះបញ្ជាក់ថា អ្វីដែលរុស្ស៊ីទទួលបានក្នុងឆ្នាំនោះ គឺទំនុកចិត្តយ៉ាងមុតមាំលើភាពខ្លាំងរបស់ខ្លួន ទោះបីជាសង្គ្រាមអូសបន្លាយពេលដល់ ១ ឆ្នាំក៏ដោយ ហើយរុស្ស៊ីនឹងសម្រេចបានគោលដៅជ័យជម្នះរបស់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ ទីបំផុត រថក្រោះខ្លារខិន Leopard 2 ទៅដល់ដៃ អ៊ុយក្រែន ហើយ