ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយថា ទីក្រុងមូស្គូកំពុងខិតខំបង្កើតពិភពលោកពហុប៉ូល ជាជាងពិភពលោកមួយដែលផ្តោតតែលើសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងបទសម្ភាសន៍ជាមួយប៉ុស្តិ៍ទូរទស្សន៍ Rossiya-1 កាលពីថ្ងៃអាទិត្យទី២៦ខែកុម្ភៈ លោកពូទីនអះអាងថា ទីក្រុងវ៉ាស៊ីនតោន កំពុងព្យាយាមបង្កើតពិភពលោកផ្តាច់មុខឲ្យសមនឹងរបៀបវារៈរបស់ខ្លួន។

លោកពូទីនលើកឡើងថា “រដ្ឋផ្កាយរណប” របស់អាមេរិកក៏ដឹងយ៉ាងច្បាស់អំពីចេតនា “អត្មានិយម” ទាំងនេះផងដែរ។ ទោះបីជាយ៉ាងណាក៏ដោយ បច្ចុប្បន្ន ពួកគេធ្វើមិនដឹងមិនឮ ចំពោះបញ្ហានេះ ដោយសារតែហេតុផលផ្សេងៗគ្នា។

លោកបន្ថែមថា សម្ព័ន្ធមិត្តមួយចំនួនរបស់ទីក្រុងវ៉ាស៊ីនតោន ក៏មើលឃើញដែរថា ការប្រឈមមុខដាក់គ្នាជាមួយរុស្ស៊ី គឺជាបុព្វហេតុបង្រួបបង្រួម លែងខ្វល់អំពីការខ្វែងគំនិតរវាងពួកគេ និងសហរដ្ឋអាមេរិក។

ជាឧទាហរណ៍ លោកពូទីនបានលើកឡើងពីកិច្ចខិតខំប្រឹងប្រែងរបស់រដ្ឋាភិបាលទីក្រុងវ៉ាស៊ីនតោន ក្នុងការទាក់ទាញអាជីវកម្មអឺរ៉ុបមកកាន់ដីអាមេរិក ដូចជាកិច្ចព្រមព្រៀងនាវាមុជទឹកកាលពីរដូវក្តៅមុនជាដើម ដែលគេឃើញទីក្រុងកង់បេរ៉ា បានចាកចេញពីកិច្ចសន្យាភ្លាមៗជាមួយក្រុមហ៊ុនផលិតរបស់បារាំង ដើម្បីគាំទ្រដៃគូសហរដ្ឋអាមេរិក។ លោកប្រធានាធិបតីពូទីននិយាយថា ឧបទ្ទវហេតុនោះគឺជារឿងអាម៉ាស់សម្រាប់ទីក្រុងប៉ារីស។

លោក ពូទីន សង្កត់ធ្ងន់ថា ទីក្រុងមូស្គូមិនអាច និងនឹងមិនប្រព្រឹត្តទង្វើបែបនេះឡើយ។

ចំពោះបញ្ហាផ្អាកការចូលរួមរបស់រុស្ស៊ីនៅក្នុងសន្ធិសញ្ញា New START ដែលជាកិច្ចព្រមព្រៀងនុយក្លេអ៊ែរចុងក្រោយរវាងទីក្រុងមូស្គូ និងវ៉ាស៊ីនតោនឯណោះវិញ លោកពូទីនបានអះអាងថា ការសម្រេចចិត្តនេះគឺត្រូវបានទាមទារ ដើម្បីការពារសន្តិសុខរបស់រុស្ស៊ីក៏ដូចជា ស្ថិរភាពជាយុទ្ធសាស្រ្តរបស់ខ្លួនផងដែរ។

យោងតាមប្រធានាធិបតីរុស្ស៊ី, លោកបានជ្រើសរើសសម្រាប់សកម្មភាពនេះ ដោយមើលឃើញពីទង្វើរបស់អង្គការណាតូ ដែលប្រកាសថា គោលដៅសំខាន់របស់ខ្លួនគឺជាបរាជ័យរបស់រុស្ស៊ី៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ១១ចំណុចសំខាន់ ដែលលោក ពូទីន បង្ហាញទៅពិភពលោក ក្នុងសុន្ទរថាពិសេស