ព័ត៌មានអន្ដរជាតិ

ខ្មាន់កាំភ្លើងជានារី ចូលបាញ់ប្រហារក្នុងសាលាបឋមសិក្សាអាមេរិក សម្លាប់មនុស្សយ៉ាងរង្គាល

បានផុស

៣ years មុន

នៅ

ថ្ងៃអង្គារ ២៨ មីនា ២០២៣

ដោយ

មនុស្សចំនួន ៦ នាក់បានបាត់បង់ជីវិតក្នុងការបាញ់សម្លាប់រង្គាលចុងក្រោយបង្អស់របស់អាមេរិកនៅថ្ងៃចន្ទទី២៧ ខែមីនា (ពេលវេលានៅអាមេរិក) ត្រូវនឹងថ្ងៃអង្គារទី២៨ ខែមីនា (ពេលវេលានៅកម្ពុជា) ។

ឧបទ្ទវហេតុនេះកើតឡើងនៅសាលាបឋមសិក្សាគ្រិស្តសាសនាឯកជនមួយកន្លែង ក្នុងទីក្រុង Nashville នៃរដ្ឋ Tennessee ខណៈជនសង្ស័យត្រូវបានប៉ូលិសបាញ់សម្លាប់។

អ្នកនាំពាក្យនាយកដ្ឋានប៉ូលិសក្រុង Nashville លោក Don Aaron បានប្រាប់អ្នកយកព័ត៌មានថា កុមារចំនួន៣នាក់ និងបុគ្គលិកពេញវ័យ៣នាក់ ត្រូវបានសម្លាប់នៅក្នុងការបាញ់ប្រហារដែលចាប់ផ្តើមនៅម៉ោងប្រហែល១០ព្រឹក នៅសាលា Covenant ក្នុងសង្កាត់ Green Hills នៃទីក្រុង Nashville ភាគនិរតី ខណៈដែលឃាតករដែលមិនស្គាល់អត្តសញ្ញាណ គឺជា នារីវ័យជំទង់ ។

យោងតាមអ្នកនាំពាក្យ, មន្ត្រី ២ នាក់បានបាញ់សម្លាប់ជនសង្ស័យ ក្នុងរយៈពេល១៤នាទី បន្ទាប់ពីទទួលបានការហៅទូរស័ព្ទបន្ទាន់អំពីឧបទ្ទវហេតុនេះ ក្រោយពេលខ្មាន់កាំភ្លើងដែលប្រដាប់ដោយកាំភ្លើងវែងចំនួន ២ ដើម និងកាំភ្លើងខ្លីមួយដើម បានចូលទៅក្នុងសាលាតាមទ្វារចំហៀង ហើយចាប់ផ្តើមបាញ់ជាច្រើនគ្រាប់ ។ ទោះបីជាយ៉ាងណាក៏ដោយ មូលហេតុនៃការវាយប្រហារនេះ មិនត្រូវបានគេដឹងភ្លាមៗទេ ។

គួរបញ្ជាក់ថា សហរដ្ឋអាមេរិកមានការបាញ់ប្រហារនៅសាលារៀនរាប់សិបលើកកាលពីឆ្នាំមុន ដែលជាហេតុនាំឲ្យមានការអំពាវនាវ ឲ្យរឹតបន្តឹងកាន់តែខ្លាំងលើការកាន់កាប់កាំភ្លើង។ ទីបំផុត សភាសហរដ្ឋអាមេរិកកាលពីខែមិថុនាឆ្នាំមុន បានអនុម័តច្បាប់គ្រប់គ្រងកាំភ្លើងទ្រង់ទ្រាយធំជាលើកដំបូងរបស់ប្រទេស ក្នុងរយៈពេលជិតបីទសវត្សរ៍៕

ប្រែសម្រួល៖ Vann Vann

ប្រភព៖ RT

ចុចអាន៖ បាញ់ប្រហារ ៣លើក ស្លាប់និងរបួសមនុស្សជាង ៣០នាក់ នៅ សហរដ្ឋអាមេរិក