ព័ត៌មានអន្ដរជាតិ

លោក Macron ថា អឺរ៉ុប មិនត្រូវធ្វើជាបរិវាររបស់អាមេរិក ឬចិនទេ ចំពោះបញ្ហាកោះតៃវ៉ាន់

បានផុស

៣ years មុន

នៅ

ថ្ងៃចន្ទ ១០ មេសា ២០២៣

ដោយ

នៅក្នុងបទសម្ភាសន៍ជាមួយកាសែត Les Echo កាលពីថ្ងៃអាទិត្យទី០៩ខែមេសា, ប្រធានាធិបតីបារាំងលោក Emmanuel Macron បានរំលឹកឡើងវិញ នូវការអំពាវនាវរបស់គាត់ឲ្យអឺរ៉ុបរក្សាគោលនយោបាយការបរទេសឯករាជ្យ។

ប្រធានាធិបតីបារាំងលោក Emmanuel Macron (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា “អឺរ៉ុបមិនត្រូវធ្វើជាបរិវាររបស់អាមេរិក ឬចិនទេ លើបញ្ហាកោះតៃវ៉ាន់។ យើងមិនចង់ចូលទៅក្នុងប្រព័ន្ធដែលមានប្លុកមួយ ទល់នឹងប្លុកមួយនោះទេ។ អឺរ៉ុប មិនគួរត្រូវជាប់នៅក្នុងពិភពលោកនិងវិបត្តិគ្មានភាពប្រក្រតី ដែលមិនមែនជារបស់ខ្លួនឡើយ”។

ការអះអាងនេះកើតឡើង បន្ទាប់ពីលោក Macron និងមន្ត្រី EU ផ្សេងទៀត បំពេញទស្សនកិច្ចនៅប្រទេសចិន ដែលក្នុងនោះ រួមមានទាំងជំនួបជាមួយប្រធានរដ្ឋចិនលោក ស៊ី ជីនពីង ផងដែរ។ ក្នុងចំណោមបញ្ហាទាំងអស់ មេដឹកនាំទាំងពីរ ក៏បានពិភាក្សាអំពីភាពតានតឹងជុំវិញកោះតៃវ៉ាន់ និងការវាយលុករបស់រុស្ស៊ីលើអ៊ុយក្រែនផងដែរ។

លោក Macron បានសង្កត់ធ្ងន់ថា បញ្ហាកោះតៃវ៉ាន់ មិនស្ថិតក្នុងការចាប់អារម្មណ៍របស់ EU ទេ។ លោកបន្តថា រដ្ឋជាសមាជិករបស់ EU គួរតែចៀសវាង ការក្លាយជាបរិវារ ហើយថា ប្លុកនេះអាចដើរតួជា “ប៉ូលទីបី” នៅក្នុងភូមិសាស្ត្រនយោបាយ រួមជាមួយសហរដ្ឋអាមេរិក និងចិន។

គួរបញ្ជាក់ជាថ្មី ភាពតានតឹងលើបញ្ហាកោះតៃវ៉ាន់ បានឡើងកម្តៅខ្លាំង ក្នុងរយៈពេលប៉ុន្មានខែចុងក្រោយ ខណៈបច្ចុប្បន្ន ចិនកំពុងធ្វើសមយុទ្ធយោធាជាបន្តបន្ទាប់ជុំវិញកោះនេះ៕

ប្រែសម្រួល៖ Vann Vann

ប្រភព៖ CNA, DW

ចុចអាន៖ ជំនួបលោក Macron និង Xi Jinping ៖ ប្រឆាំងការប្រើអាវុធនុយក្លេអ៊ែរ ហើយឲ្យ រុស្ស៊ី-អ៊ុយក្រែន ចរចារកសន្តិភាព