វៀតណាម កំពុងក្តៅសុខៗ ស្រាប់តែប្រែប្រួលអាកាសធាតុ ទៅជាធ្លាក់ទឹកកក

ជារឿងដ៏កម្រសម្រាប់តំបន់មួយចំនួននៅក្នុងប្រទេសវៀតណាម ដែលអាកាសធាតុកំពុងតែក្តៅសុខៗ ស្រាប់តែប្រែក្លាយទៅជាត្រជាក់ ហើយមានខ្យល់បក់ខ្លាំង ថែមទាំងធ្លាក់ទឹកកកទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខ្យល់​ត្រជាក់​បាន​ជះ​ឥទ្ធិពល​ដល់​តំបន់​ភាគ​ឦសាន និង​ភាគ​ខាងជើង​ភាគ។ នៅទីក្រុងហាណូយ ចាប់ពីរសៀលថ្ងៃទី៨ខែឧសភាទៅ អាកាសធាតុបានប្រែជាត្រជាក់ ហើយនៅតាមសង្កាត់មួយចំនួនដូចជា Thanh Xuan និង Ha Dong ក៏មានភ្លៀងធ្លាក់ផងដែរ។

លើសពីនេះ ព្យុះផ្គររន្ទះ អមដោយខ្យល់បក់បោកខ្លាំង បានបណ្តាលឲ្យផ្ទះប្រជាពលរដ្ឋដួលរលំនៅក្នុងខេត្ត Nghe An។

គេរំពឹងថា ក្នុងអំឡុងពេលរលកខ្យល់ត្រជាក់នេះ សីតុណ្ហភាពនៅទីក្រុងហាណូយ និងខេត្តភាគឦសាន នឹងមានពី២១ទៅ២៤អង្សាសេ ហើយកន្លែងខ្លះនៅលើភ្នំនឹងទាបជាង២១អង្សាសេ។

គួរ​កត់​សម្គាល់​ថា បន្ទាប់​ពី​មាន​កម្ដៅ​ខ្លាំង​មួយ​រយៈ​មក នៅ​តាម​ស្រុក​មួយ​ចំនួន​ក្នុង​ខេត្ត Cao Bang ដូច​ជា Ha Quang និង Trung Khanh គឺស្រាប់តែមាន​ភ្លៀង​ធ្លាក់។

អាជ្ញាធរព្រមានថា លទ្ធភាពនៃគ្រោះធម្មជាតិដែលអមដោយខ្យល់ត្រជាក់ នឹងបន្តកើតមានក្នុងរយៈពេលប៉ុន្មានថ្ងៃខាងមុខ។ អាស្រ័យហេតុនេះ ចាប់ពីថ្ងៃទី៩ខែឧសភាទៅ តំបន់ភាគខាងជើងរួមទាំងទីក្រុងហាណូយ និងតំបន់កណ្តាលខាងជើង នឹងមានភ្លៀងធ្លាក់រាយប៉ាយ និងផ្គររន្ទះ។

គណៈកម្មាធិការជាតិដឹកនាំការពារ និងគ្រប់គ្រងគ្រោះមហន្តរាយធម្មជាតិ ក៏បានព្រមានដែរថា ខ្យល់កន្ត្រាក់ អមដោយបាតុភូតអាកាសធាតុ ដូចជាខ្យល់កួច ផ្លេកបន្ទោរ ធ្លាក់ទឹកកក និងខ្យល់ខ្លាំង អាចប៉ះពាល់ដល់ផលិតកម្មកសិកម្ម និងបំផ្លាញដើមឈើ ខូចខាតផ្ទះសម្បែង កកស្ទះចរាចរណ៍ និងប៉ះពាល់ដល់ហេដ្ឋារចនាសម្ព័ន្ធ ហើយភ្លៀងធ្លាក់ខ្លាំងក្នុងតំបន់ ទំនងជាបណ្តាលឲ្យមានគ្រោះទឹកជំនន់នៅតំបន់ទំនាប៕

ប្រែសម្រួល៖ Vann Vann

ប្រភព៖ Vietnam Post

ចុចអាន៖ អាកាសធាតុនៅវៀតណាម ក្តៅខ្លាំងបំបែកកំណត់ត្រាថ្មី