រកឃើញកូនក្មេង ៤ នាក់នៅមានជីវិត ក្រោយការធ្លាក់យន្តហោះក្នុងព្រៃ ប្រទេសកូឡុំប៊ី

ព្រឹត្តិការណ៍ធ្លាក់យន្តហោះនៅក្នុងព្រៃនៃប្រទេសកូឡុំប៊ី កើតឡើងតាំងពីថ្ងៃទី០១ ខែឧសភា មកម្ល៉េះ ដោយសារតែបញ្ហាម៉ាស៊ីនបណ្ដាលឲ្យមនុស្សពេញវ័យ ៣ នាក់បាត់បង់ជីវិត និងរកឃើញកុមារ ៤ នាក់ដោយសុវត្ថិភាព ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យន្តហោះដែលមានបញ្ហាគឺ Cessna 206 ផ្ទុកមនុស្សសរុប ៧ នាក់ ក្នុងចំណោមនោះមានកូនក្មេង ៤ នាក់ អាយុ ១១ ខែ ៤ ឆ្នាំ ៩ ឆ្នាំ និង ១៣ ឆ្នាំ ។

យ៉ាងណាមិញ អ្នកជួយសង្គ្រោះចំណាយពេលជិត ៣ សប្ដាហ៍ដើម្បីស្វែងរកពួកគេនៅក្នុងព្រៃដ៏ក្រាស់ឃ្មឹក ។ ចំណែកឯក្រុមជួយសង្គ្រោះដែលមានឆ្កែហិតក្លិន ក៏បានប្រទះឃើញកាកសំណល់ផ្លែឈើក្មេងៗញ៉ាំដើម្បីបន្តជីវិត និងជម្រកធ្វើពីរុក្ខជាតិព្រៃដែលពួកគេសាងសង់ឡើងផងដែរ ។

ប្រធានាធិបតីកូឡុំប៊ី លោក Gustavo Petro មានប្រសាសន៍ថា នេះជាការស្វែងរកដ៏លំបាកដោយប្រើកម្លាំងយោធា ហើយគាត់បាននិយាយទៀតថា ការរកឃើញក្មេងៗជា “សេចក្ដីរីករាយសម្រាប់ប្រទេសទាំងមូល” តែម្ដង។

យោងតាមព័ត៌មានបឋមពីអាជ្ញាធរអាកាសចរណ៍ស៊ីវិលកូឡុំប៊ី ដែលសម្របសម្រួលកិច្ចខិតខំប្រឹងប្រែងជួយសង្គ្រោះបង្ហាញថា ក្មេងៗនាំគ្នារត់ចេញពីយន្តហោះ ហើយធ្វើដំណើរចូលក្នុងទៅព្រៃ ដើម្បីស្វែងរកជំនួយទើបចំណាយពេលរកយូរបែបនេះ ។

សូម្បីតែយន្តហោះ និងឧទ្ធម្ភាគចក្រមកពីខាងកងទ័ពជើងគោក និងកងទ័ពអាកាសរបស់ប្រទេសកូឡុំប៊ី សុទ្ធតែបានចូលរួមក្នុងប្រតិបត្តិការជួយសង្គ្រោះទាំងអស់គ្នាយ៉ាងលំបាកឥតស្រាកស្រាន្ត ៕

ប្រភព ៖ skynews

ចុចអាន ៖ នេប៉ាល់ ជួបហេតុការណ៍ធ្លាក់យន្តហោះ មិនតិចលើកទេ ចាប់តាំងពីឆ្នាំ២០១០មក