ចិន ហាមក្រុមហ៊ុនខ្លួន​ មិនឲ្យទិញ​ផលិតផលពី អាមេរិក​

ចិនបានហាមប្រាមក្រុមហ៊ុន​របស់ខ្លួនដែលធ្វើការលើគម្រោង​ហេដ្ឋារចនា​សម្ព័ន្ធសំខាន់ៗ មិនឲ្យទិញផលិតផល​ពីក្រុមហ៊ុនផលិតគ្រឿងអេឡិចត្រូនិច Micron ​របស់អាមេរិកឡើយ​ បន្ទាប់ពីធ្វើការស៊ើបអង្កេត​រួច ។

រដ្ឋបាល Cyberspace របស់ប្រទេសចិនបានប្រកាសពីការសម្រេចចិត្តនេះកាលពីថ្ងៃចន្ទដោយនិយាយថា ក្រុមហ៊ុនផលិតបន្ទះឈីបរបស់សហរដ្ឋអាមេរិកបានបរាជ័យក្នុងការឆ្លងកាត់ការត្រួតពិនិត្យប្រព័ន្ធសុវត្ថិភាពតាមអ៊ីនធឺណិត ។

និយតករចិនបាននិយាយនៅក្នុងសេចក្តីថ្លែងការណ៍មួយថា បន្ទាប់ពីធ្វើការត្រួតពិនិត្យរួចហើយ បានរកឃើញផលិតផលរបស់ក្រុមហ៊ុន Micron ​មានហានិភ័យប្រព័ន្ធសុវត្ថិភាពតាមអ៉ីនធឺណិតយ៉ាងធ្ងន់ធ្ងរ ដែលនាំឲ្យប៉ះពាល់ដល់សន្តិសុខចំពោះខ្សែសង្វាក់ផ្គត់ផ្គង់ហេដ្ឋារចនាសម្ព័ន្ធព័ត៌មានសំខាន់ៗរបស់ប្រទេសចិន រួមទាំងប៉ះពាល់ដល់សន្តិសុខជាតិផងដែរ ។ ដូចនេះ អ្នកដែលពាក់ព័ន្ធនឹងគម្រោងហេដ្ឋារចនាសម្ព័ន្ធព័ត៌មានសំខាន់ៗក្នុងស្រុក គួរតែបញ្ឈប់ការទិញផលិតផលពីក្រុមហ៊ុន Micron ។

ទន្ទឹមនោះ ការសម្រេចចិត្តនេះបានកើតឡើងរយៈពេល ៧ សប្តាហ៍ បន្ទាប់ពីនិយ័តករចិន​ចាប់ផ្តើមការត្រួតពិនិត្យប្រព័ន្ធសុវត្ថិភាពតាមអ៉ីនធឺណេតនៃផលិតផលរបស់ក្រុមហ៊ុន Micron ដែលជាការសងសឹកនឹងការដាក់ទណ្ឌកម្មដែលក្រុងវ៉ាស៊ីនតោន និងសម្ព័ន្ធមិត្តបានធ្វើមកលើចិន ។

ក្រុមហ៊ុនបច្ចេកវិទ្យា Micron គឺជាក្រុមហ៊ុនផលិតបន្ទះឈីបអង្គចងចាំដ៏ធំបំផុតមួយរបស់សហរដ្ឋអាមេរិក ខណៈចំណូលច្រើនជាង ១០ ភាគរយរបស់ក្រុមហ៊ុនបានមកពី​ការលក់នៅចិនដីគោក ។

គួរឲ្យដឹងថា ចាប់តាំងពីខែតុលា ឆ្នាំ ២០២២ មក ទីក្រុងវ៉ាស៊ីនតោនបានដាក់ការទប់ស្កាត់នាំចេញលើបន្ទះឈីប និងឧបករណ៍ផលិតបន្ទះឈីបកម្រិតខ្ពស់ទៅកាន់ប្រទេសចិន ដោយបារម្ភពីការប្រើប្រាស់បច្ចេកវិទ្យាសម្រាប់យោធា ។ បន្ថែមពីនេះ សមរភូមិបច្ចេកវិទ្យា semiconductor ក៏ជាផ្នែកមួយនៃការបែកបាក់កាន់តែខ្លាំងឡើងរវាងអាមេរិក និងចិន ដែលក្នុងរយៈពេលប៉ុន្មានឆ្នាំចុងក្រោយនេះ ទំនាក់ទំនងរវាងប្រទេសទាំងពីរបានឈានដល់កម្រិតទាបបំផុតមិនធ្លាប់មាន ៕

ប្រែសម្រួល៖ នាង រតនៈ

ប្រភព៖​ CNN

ចុចអាន៖ ចិន កោះហៅឯកអគ្គរាជទូតជប៉ុន មកតវ៉ា ពាក់ព័ន្ធ សេចក្តីថ្លែងការណ៍នៅ G7