អ៊ុយក្រែន ចោទរុស្ស៊ី បំផ្ទុះទំនប់វារីអគ្គិសនីនៅតំបន់ Kherson បង្កហានិភ័យ គ្រោះទឹកជំនន់ ធ្ងន់ធ្ងរ

មន្ត្រីអ៊ុយក្រែន និងរុស្ស៊ីបាននិយាយនៅថ្ងៃអង្គារទី៦ខែមិថុនាថា ទំនប់ Kakhovka នៅភាគខាងត្បូងប្រទេសអ៊ុយក្រែន ត្រូវបានបំផ្ទុះ ដោយគំរាមបង្កជាគ្រោះទឹកជំនន់ ជន់លិចតំបន់នៅខ្សែទឹកខាងក្រោមនៃទន្លឹ Dnipro។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទំនប់វារីអគ្គិសនីសម័យសូវៀតមួយនេះ ក៏ផ្គត់ផ្គង់ទឹកដល់ឧបទ្វីបគ្រីមៀ ដែលត្រូវបានកាត់បញ្ចូលដោយរុស្ស៊ីក្នុងឆ្នាំ២០១៤ និងផ្គត់ផ្គង់ដល់រោងចក្រនុយក្លេអ៊ែរ Zaporizhzhia ដែលស្ថិតនៅក្រោមការគ្រប់គ្រងរបស់រុស្ស៊ីផងដែរ។

ទីបញ្ជាការខាងត្បូង​ នៃកងកម្លាំងប្រដាប់អាវុធអ៊ុយក្រែន បាននិយាយនៅព្រឹកថ្ងៃអង្គារ លើទំព័រហ្វេសប៊ុករបស់ខ្លួនថា “អាងស្តុកទឹក Kakhovka ត្រូវបានបំផ្ទុះដោយកងកម្លាំងកាន់កាប់របស់រុស្ស៊ី។ ទំហំនៃការបំផ្លិចបំផ្លាញ ល្បឿន បរិមាណទឹក និងតំបន់ដែលទំនងជាជន់លិច កំពុងត្រូវបានវាយតម្លៃ”។

ស្របពេលជាមួយគ្នានោះ រដ្ឋបាលតំបន់ Kherson និយាយថា ទឹកនឹងឡើងដល់កម្រិតធ្ងន់ធ្ងរក្នុងរយៈពេលប្រាំម៉ោងទៀត ហើយអាជ្ញាធរ បានចាប់ផ្តើមជម្លៀសប្រជាជនចេញពីតំបន់គ្រោះថ្នាក់ហើយ។

រឿងនេះកើតឡើង បន្ទាប់ពីអ៊ុយក្រែន អះអាងថា កងកម្លាំងរបស់ខ្លួន កំពុងបើកប្រតិបត្តិការវាយលុកក្នុងតំបន់មួយចំនួន ជាពិសេសនៅទីក្រុង Bakhmut ភាគខាងកើត។

អនុរដ្ឋមន្ត្រីការពារជាតិអ៊ុយក្រែន លោកស្រី Hanna Malyar និយាយថា កងទ័ពអ៊ុយក្រែន វាយយកបានទឹកដីរហូតដល់ទៅ ១.៦ គីឡូម៉ែត្រក្នុងទិសដៅជាច្រើននៅជុំវិញទីក្រុង ខណៈកងកម្លាំងរុស្ស៊ី ក៏ស្ថិតលើផ្នែកការពារនៅភាគខាងត្បូងផងដែរ។

ស្របពេលជាមួយគ្នានោះ មេបញ្ជាការកងទ័ពជើងគោកអ៊ុយក្រែន លោកឧត្តមសេនីយ៍ Oleksandr Syrskyi ក៏បាននិយាយដែរថា កងទ័ពកំពុងវាយឆ្ពោះទៅមុខ សំដៅទៅទីក្រុង Bakhmut ហើយបានបំផ្លាញទីតាំងរបស់រុស្ស៊ីនៅជិតទីក្រុងនេះ៕

ប្រែសម្រួល៖ Vann Vann

ប្រភព៖ DW, BBC

ចុចអាន៖ ប្រតិបត្តិការវាយលុករបស់អ៊ុយក្រែន ទទួលបានផ្លែផ្កា នៅភាគខាងកើត