Connect with us

ព័ត៌មានអន្ដរជាតិ

អ៊ុយក្រែន ព្រមានថា លោក ពូទីន អាចព្យាយាមបំផ្ទុះរោងចក្រនុយក្លេអ៊ែរធំបំផុត នៅអឺរ៉ុប

បានផុស

នៅ

ប្រទេសអ៊ុយក្រែន​​ព្រមាន​ថា រុស្ស៊ី​អាច​នឹង​រៀបចំ​ផែនការ​បំផ្ទុះ​រោងចក្រ​ថាមពល​នុយក្លេអ៊ែរ​ធំ​បំផុត​នៅ​អឺរ៉ុប បន្ទាប់​ពី​ការ​ផ្ទុះ​នៅ​ទំនប់​វារីអគ្គិសនី​ធំ​មួយ ​បាន​បង្កឲ្យ​មាន​ការ​ជន់​លិចធំធេង​ក្នុង​តំបន់ Kherson និង​បង្ក​ជាគ្រោះ​មហន្តរាយ​មនុស្សធម៌។

(រូបថត​៖ AP)
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្ទុះជាបន្តបន្ទាប់កាលពីថ្ងៃអង្គារ ទី៦ ខែមិថុនា បានបណ្តាលឲ្យទំនប់ Nova Kahkovka ដ៏សំខាន់ ស្ថិតនៅតាមដងទន្លេ Dnipro បាក់ផ្នែកខ្លះ ហើយនាំឲ្យមានមហន្តរាយទឹកជំនន់ផងដែរ ។

ស្របពេលជាមួយគ្នានោះ ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី បានចោទរុស្ស៊ីថា ជាអ្នកបំផ្ទុះគ្រាប់បែកបង្កការបំផ្លិចបំផ្លាញធំធេងនេះ ។ លោកនិយាយថា ឧក្រិដ្ឋកម្មនេះ នាំមកនូវការគំរាមកំហែងយ៉ាងសម្បើម ហើយនឹងមានផលវិបាកធ្ងន់ធ្ងរដល់ជីវិតមនុស្ស និងព្រមទាំងបរិស្ថាន ខណៈមន្ត្រីសន្តិសុខអាមេរិកព្រមានថា ទឹកជំនន់ ទំនងជាបណ្តាលឲ្យមានមនុស្សស្លាប់យ៉ាងច្រើន។

(រូបថត៖ E2W)

ទោះបីជាយ៉ាងណាក៏ដោយ វិមានក្រឹមឡាំង បានដាក់ការស្តីបន្ទោសលើអ៊ុយក្រែនចំពោះការបំផ្ទុះនេះ ដោយអះអាងថា វាគឺជាការប៉ុនប៉ងរបស់ទីក្រុងកៀវ ដើម្បីបង្វែរអារម្មណ៍ ពីប្រតិបត្តិការវាយបកទ្រង់ទ្រាយធំ។

ប៉ុន្តែមន្ត្រីសន្តិសុខកំពូលរបស់លោក ហ្សេលេនស្គី គឺលោក អាឡិចស៊ីវ ដានីឡូហ្វ បានច្រានចោលការចោទប្រកាន់នេះ ហើយអះអាងថា ជំហានបន្ទាប់របស់លោក ពូទីន គឺអាចជាការវាយប្រហារទៅលើរោងចក្រថាមពលនុយក្លេអ៊ែរ Zaporizhzhia តែម្តង។

(រូបថត​៖ Reuters)

លោក ដានីឡូហ្វ បានប្រាប់កាសែត Times ថា ចាប់តាំងពីប្រតិបត្តិការវាយលុករបស់លោក ពូទីន ឈានចូលដំណាក់កាលថ្មី ហើយចាប់តាំងពីគាត់បានបំផ្ទុះរោងចក្រវារីអគ្គិសនីតាមចិត្តមក គាត់បានត្រៀមខ្លួនធ្វើគ្រប់យ៉ាង។

គួរបញ្ជាក់ថា មូលហេតុនៃការផ្ទុះទំនប់ក្នុងតំបន់ Kherson នៅមិនទាន់ត្រូវបានគេដឹងច្បាស់នៅឡើយទេ ថ្វីបើអ៊ុយក្រែនធ្លាប់ព្រមានកាលពីចុងឆ្នាំមុនថា កងកម្លាំងរុស្ស៊ី បានបង្កៃគ្រាប់មីននៅទំនប់នេះ ពេលដែលពួកគេបានដកចេញពីតំបន់ក៏ដោយ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ចិន បារម្ភអំពី គ្រោះមហន្តរាយនុយក្លេអ៊ែរ ក្រោយបាក់ទំនប់នៅ Kherson

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម