មេដឹកនាំ ស៊ែបបូស្នៀ ថា អង់គ្លេស កំពុងរិះរិកវិធីផ្ដួលរំលំរដ្ឋាភិបាលទីក្រុង​បែលក្រាដ

លោក Milorad Dodik ប្រមុខសាធារណរដ្ឋ Republika Srpska បាននិយាយកាលពីពេលថ្មីៗនេះថា ទីភ្នាក់ងារស៊ើបការណ៍សម្ងាត់របស់អង់គ្លេសកំពុងបង្កភាពចលាចលជាសាធារណៈនៅក្នុងប្រទេសស៊ែប៊ី ក្នុងគោលបំណងបណ្តេញរដ្ឋាភិបាលទីក្រុងបែលក្រាដរបស់លោកប្រធានាធិបតី Aleksandar Vucic ចេញពីតំណែង ។

លោក Dodik បាននិយាយនៅក្នុងសេចក្ដីថ្លែងការណ៍មួយថា ទីភ្នាក់ងារចារកម្មរបស់ចក្រភពអង់គ្លេសកំពុងព្យាយាមប្រើការបាញ់ប្រហារទ្រង់ទ្រាយធំចំនួន ២ នាពេលថ្មីៗនេះនៅក្នុងសាលារៀនស៊ែប៊ី ដែលបង្កឲ្យមានការតវ៉ាដ៏ធំ ដើម្បីដាក់សម្ពាធលើរដ្ឋាភិបាលរបស់ប្រទេស ។

មេដឹកនាំស៊ែបបូស្នៀរូបនេះបានលើកឡើងទៀតថា “អ្នកបំផុសគំនិត និងអ្នកបង្កភាពរញ៉េរញ៉ៃនៅក្នុងប្រទេសស៊ែប៊ីនាពេលនេះ គឺជាជនជាតិអង់គ្លេស ហើយនោះគឺជាទីភ្នាក់ងារចារកម្មសម្ងាត់របស់ទីក្រុងឡុងដ៍ សហការជាមួយនឹងជនជាតិស៊ែប៊ី” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបញ្ជាក់បន្ថែមថា “ការតវ៉ានាពេលកន្លងមកនេះមានគោលដៅច្បាស់លាស់គឺ ទាញយកផលប្រយោជន៍ពីសោកនាដកម្ម និងការសម្លាប់រង្គាលលើយុវជន ដូច្នេះលោក Vucic នឹងត្រូវដកចេញពីអំណាច ក្រោមលេសទាំងនោះ ក៏ដូចជាតាមរយៈការតវ៉ាតាមដងផ្លូវជាដើម” ។

ទន្ទឹមនោះលោក Dodik ក៏បានប្រៀបធៀបភាពចលាចលនៅក្នុងប្រទេសស៊ែប៊ីនាពេលថ្មីៗនេះ ទៅនឹងការតវ៉ាស្រដៀងគ្នាកាលពីឆ្នាំ២០១៨ នៅសាធារណរដ្ឋ Republika Srpska ផងដែរ ជុំវិញការស្លាប់របស់លោក David Dragicevic ជានិស្សិតផ្នែកបច្ចេកវិទ្យាអាយុ ២១ ឆ្នាំ ខណៈប៉ូលិស​បាន​ចាត់​ទុកហេតុការណ៍នេះថា​ជា​ឧបទ្ទវហេតុ​ ប៉ុន្តែ​ឪពុក​ម្តាយ​របស់សិស្សនិស្សិតរូបនេះបានអះអាង​ថា គាត់​ត្រូវ​បាន​គេ​ធ្វើ​ទារុណកម្ម និង​សម្លាប់​យ៉ាង​ព្រៃផ្សៃ ហើយ​ថែមទាំងបាន​ចោទ​ភ្នាក់ងារ​អនុវត្ត​ច្បាប់​ពី​បទ​លាក់​បាំងឧបទ្ទវហេតុ​នេះផងដែរ ។

គួរបញ្ជាក់ថា កាលពីចុងសប្តាហ៍កន្លងទៅ បាតុករប្រឆាំងរដ្ឋាភិបាលរាប់ពាន់នាក់បានប្រមូលផ្តុំគ្នានៅទីក្រុងបែលក្រាដ ដើម្បីតវ៉ាប្រឆាំងនឹងការបរាជ័យរបស់លោក Vucic ក្នុងការបញ្ឈប់អំពើហិង្សាដែលកំពុងត្រូវបានរីករាលដាលយ៉ាងខ្លាំងនៅក្នុងប្រព័ន្ធផ្សព្វផ្សាយ ខណៈយុទ្ធនាការនេះត្រូវបានបង្កឡើងដោយការបាញ់ប្រហារនៅសាលារៀនចំនួន ២ កន្លែងក្នុងរយៈពេល ២ ថ្ងៃនៅដើមខែឧសភា ដែលបានឆក់យកជីវិតមនុស្សសរុប ១៨ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ ប្រធានាធិបតី ស៊ែប៊ី រងការគំរាមសម្លាប់ មួយថ្ងៃមិនតិចជាង ២០០ដង