រឿងរ៉ាវដូចគ្នាមួយកើតឡើងក្នុងសោកនាដកម្មលើយានជ្រមុជទឹក Titan និងកប៉ាល់ Titanic

សោកនាដកម្មមនុស្សស្លាប់ក្នុងយានជ្រមុជទឹក Titan ដែលចុះទៅមើលខ្មោចកប៉ាល់ Titanic កាលពីថ្ងៃព្រហស្បតិ៍ ធ្វើឲ្យគេនឹកឃើញដល់អ្នកដំណើរដែលបានស្លាប់ដូចគ្នាក្នុងហេតុការណ៍លិចកប៉ាល់មួយនេះកាលពីជាង ១០០ ឆ្នាំមុន ។

រហូតមកដល់ពេលនេះ ការលិចកប៉ាល់ Titanic មានអាយុកាល ១១១ ឆ្នាំហើយ បន្ទាប់ពីវាបានលិចចូលក្នុងមហាសមុទ្រអាត្លង់ទិកកាលពីឆ្នាំ ១៩១២ ដែលបណ្ដាលឲ្យមនុស្សយ៉ាងតិច ១,៥០០ នាក់បាត់បង់ជីវិត ។

ចំណែករឿងរ៉ាវដែលបានកើតឡើងដូចគ្នាក្នុងសោកនាដកម្មទាំងនេះគឺពាក់ព័ន្ធទៅនឹងអ្នករចនាបង្កើតកប៉ាល់ ក៏ដូចជាយានជ្រមុជនៃក្រុមហ៊ុនទាំងពីរ ដែលសុទ្ធសឹងតែបានស្លាប់ដូចគ្នាក្នុងការធ្វើដំណើរកម្សាន្តនោះ ។

លោក Thomas Andrews គឺជាអ្នកជំនួញជនជាតិអង់គ្លេស និងជាអ្នកសាងសង់កប៉ាល់ Titanic នេះឡើងតែម្ដង ។ លោកបានស្លាប់នៅអាយុ ៣៩ ឆ្នាំក្នុងសោកនាដកម្មលិចកប៉ាល់ Titanic កាលពីថ្ងៃទី១៥ ខែមេសា ឆ្នាំ១៩១២ បន្ទាប់ពីកប៉ាល់បានបើកប៉ះជាមួយនឹងផ្ទាំងទឹកកកមួយកន្លែងនៅភាគខាងជើងមហាសមុទ្រអាត្លង់ទិច ។

មិនខុសគ្នាជាមួយលោក Thomas Andrews ឡើយ លោក Stockton Rush ដែលជានាយកប្រតិបត្តិក្រុមហ៊ុន OceanGate ក៏បានស្លាប់ផងដែរក្នុងវ័យ ៦១ ឆ្នាំក្នុងដំណើរកម្សាន្តរបស់យានជ្រមុជទឹក Titan ដើម្បីទៅមើលខ្មោចកប៉ាល់ Titanic នៅថ្ងៃទី២២ ខែមិថុនា ឆ្នាំ២០២៣ ជាមួយនឹងអ្នកដំណើរ ៤ រូបផ្សេងទៀត ។

គួរបញ្ជាក់ថា បើយោងតាមការបញ្ជាក់ពីឆ្មាំសមុទ្រអាមេរិក អ្នកដំណើរក្នុងយានជ្រមុជទឹក Titan បានស្លាប់អស់ហើយ ដោយសារតែការផ្ទុះដ៏មហន្តរាយ ដែលធ្វើឲ្យពិភពលោកសម្ដែងការភ្ញាក់ផ្អើល ជាពិសេសក្រុមគ្រួសារជនរងគ្រោះមានខូចចិត្តខ្លាំងមែនទែន ៕

ប្រែសម្រួលដោយ ៖ ជីវ័ន្ត

ប្រភព ៖ Wikipedia

ចុចអាន ៖ មនុស្ស ៥នាក់ក្នុងយានជ្រមុជទឹក Titan ស្លាប់អស់ហើយ