បក្សលោក Pita ចង់កែប្រែច្បាប់ដើម្បីដកហូតអំណាចសមាជិកព្រឹទ្ធសភាមិន​ឲ្យបោះឆ្នោត​ជ្រើសរើសនាយករដ្ឋមន្ត្រី

គណបក្សចលនាឆ្ពោះទៅមុខរបស់លោក Pita Limjaroenrat នៅរសៀលថ្ងៃសុក្រនេះ បានដាក់សេចក្ដីព្រាងវិសោធនកម្មមាត្រា ២៧២ នៃរដ្ឋធម្មនុញ្ញដើម្បីដកអំណាចសមាជិកព្រឹទ្ធសភាមិនឲ្យបោះឆ្នោតជ្រើសរើសនាយករដ្ឋមន្ត្រី ។

លោក Piyabut Saengkanokkul សមាជិកដ៏សំខាន់មួយរូបរបស់គណបក្សចលនាឆ្ពោះទៅមុខបាននិយាយថា សមាជិកព្រឹទ្ធសភាដែលប្រឆាំងនឹងបេក្ខភាពនាយករដ្ឋមន្ត្រីរបស់លោក Pita នឹងមិនផ្លាស់ប្តូរចិត្តរបស់ពួកគេឡើយ ទោះបីជាសភាអង្គុយបោះឆ្នោតជ្រើសរើសនាយករដ្ឋមន្ត្រីប៉ុន្មានដងទៀតក៏ដោយ លុះត្រាតែមានសញ្ញាថ្មីដើម្បីបង្ខំពួកគេឲ្យផ្លាស់ប្តូរគំនិត ឬមានការតវ៉ាទ្រង់ទ្រាយធំដើម្បីដាក់សម្ពាធពួកគេ ។

ទន្ទឹមនោះ លោកក៏បានដាក់ការសង្ស័យដែរថា សមាជិកព្រឹទ្ធសភានឹងបោះឆ្នោតគាំទ្របេក្ខភាពនាយករដ្ឋមន្ត្រីមកពីគណបក្សភឿថៃ ប្រសិនបើគណបក្សចលនាឆ្ពោះទៅមុខសម្រេចដកបេក្ខភាពលោក Pita ដើម្បីអនុញ្ញាតឲ្យគណបក្សភឿថៃដឹកនាំរដ្ឋាភិបាលថ្មី ព្រោះសមាជិកព្រឹទ្ធសភាមិនចង់ឲ្យមានបក្សរបស់លោក Pita នៅក្នុងជួររដ្ឋាភិបាលឡើយ ។

ស្របពេលជាមួយគ្នានេះ លោក Piyabut បានលើកឡើងទៀតថា ប្រសិនបើការប៉ុនប៉ងណាមួយរបស់លោក Pita នៅតែបរាជ័យទៀតនោះ យ៉ាងហោចណាស់គណបក្សមួយនេះក៏បានបង្ហាញប្រជាជនពីការខិតខំប្រឹងប្រែងរបស់ពួកគេផងដែរ ជាពិសេសគឺការគោរពតាមការសម្រេចចិត្តរបស់អ្នកបោះឆ្នោតចំនួន ២៧ លាននាក់ ។

គួរបញ្ជាក់ថា លោក Pita Limjaroenrat បានបរាជ័យក្នុងការបោះឆ្នោតជ្រើសរើសជានាយករដ្ឋមន្ត្រីថៃក្នុងជុំទី ១ នៅក្នុងសម័យប្រជុំរួមគ្នានៃរដ្ឋសភា និងព្រឹទ្ធសភាកាលពីថ្ងៃព្រហស្បតិ៍ ដោយលោកទទួលបានសំឡេងត្រឹមតែ ៣២៤ ប៉ុណ្ណោះ ពោលមិនគ្រប់សំឡេង ៣៧៦ ឡើយដើម្បីក្លាយជានាយករដ្ឋមន្ត្រី ខណៈមានសំឡេងជំទាស់ចំនួន ១៨២ និងអនុប្បវាទ ១៩៩ ប៉ុន្តែទោះជាយ៉ាងណា សភានឹងរៀបចំការបោះឆ្នោតជុំបន្ទាប់ ដែលគ្រោងធ្វើឡើងនៅថ្ងៃទី១៩ ខែកក្កដានេះ ហើយអាច​នឹងមាន​បេក្ខជន​នាយក​រដ្ឋមន្ត្រី​មួយ​រូប​ទៀតដើម្បីធ្វើការប្រកួតប្រជែងផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ លោក ប្រាយុទ្ធ នៅតែជានាយករដ្ឋមន្ត្រី ថៃ ក្រោយលោក ភីថា បរាជ័យ​បោះឆ្នោតនៅសភា