លោក ប្រាយុទ្ធ នៅតែជានាយករដ្ឋមន្ត្រី ថៃ ក្រោយលោក ភីថា បរាជ័យ​បោះឆ្នោតនៅសភា

លោក ប្រាយុទ្ធ ចាន់អូចា នៅតែជានាយករដ្ឋមន្ត្រីថៃដដែល បន្ទាប់ពីមេដឹកនាំគណបក្សចលនាឆ្ពោះទៅមុខលោក ភីថា លីមចារើនរ៉ាត់ បានបរាជ័យក្នុងការបោះឆ្នោតជ្រើសរើសជានាយករដ្ឋមន្ត្រីរបស់ប្រទេសក្នុងជុំទី ១ នៅក្នុងសម័យប្រជុំរួមគ្នានៃរដ្ឋសភា និងព្រឹទ្ធសភាកាលពីថ្ងៃព្រហស្បតិ៍ ។

លោក ប្រាយុទ្ធ ដែលទើបតែប្រកាលចូលនិវត្តន៍ពីឆាកនយោបាយកាលពីពេលថ្មីៗនេះ នឹងនៅតែជានាយករដ្ឋមន្ត្រីចាំផ្ទះរហូតដល់រដ្ឋាភិបាលថ្មីត្រូវបានបង្កើតឡើង ដោយសារតែលោក ភីថា ទទួលបានសំឡេងគាំទ្រមិនគ្រប់គ្រាន់ឡើយដើម្បីក្លាយជានាយករដ្ឋមន្ត្រីថៃ បន្ទាប់ពីមេដឹកនាំបក្សចលនាឆ្ពោះទៅមុខរូបនេះ រកបានសំឡេងត្រឹមតែ ៣២៤ ប៉ុណ្ណោះក្នុងការបោះឆ្នោតសភា ។

ទន្ទឹមនោះ ដើម្បីក្លាយជានាយករដ្ឋមន្ត្រីបាន លោក ភីថា ដែលជាបេក្ខជនតែម្នាក់គត់ក្នុងការបោះឆ្នោតជ្រើសរើសជាមេដឹកនាំប្រទេស ត្រូវការសំឡេងគាំទ្រពីសមាជិកសភាយ៉ាងតិច ៣៧៥ រូប ខណៈមុនទទួលបានសំឡេង ៣២៤, គណបក្សចលនាឆ្ពោះទៅមុខក៏បានបង្កើតក្រុមចម្រុះជាមួយគណបក្សចំនួន ៧ ផ្សេងទៀតផងដែរ ប៉ុន្តែមានសំឡេងត្រឹមតែ ៣១២ ប៉ុណ្ណោះនៅក្នុងសភាតំណាងរាស្រ្តដែលមានសមាជិក ៥០០ រូប ។

គួរបញ្ជាក់ថា នៅក្នុងសម័យប្រជុំរួមនៃរដ្ឋសភា និងព្រឹទ្ធសភាថៃដើម្បីបោះឆ្នោតជ្រើសរើសជានាយករដ្ឋមន្ត្រីកាលពីថ្ងៃព្រហស្បតិ៍ លោក ភីថា មានសំឡេងជំទាស់ចំនួន ១៨២ ខណៈសំឡេងអនុប្បវាទមានរហូតដល់ ១៩៩ ប៉ុន្តែទោះជាយ៉ាងណា សភានឹងរៀបចំការបោះឆ្នោតជុំបន្ទាប់ ដែលគ្រោងធ្វើឡើងនៅថ្ងៃទី១៩ ខែកក្កដានេះ ហើយអាច​នឹងមាន​បេក្ខជន​នាយក​រដ្ឋមន្ត្រី​មួយ​រូប​ទៀតដើម្បីធ្វើការប្រកួតប្រជែងផងដែរ ៕

អត្ថបទ ៖ ជីវ័ន្ត

ចុចអាន ៖ លោក ភីថា បរាជ័យក្នុងការបោះឆ្នោតជ្រើសរើសជានាយករដ្ឋមន្ត្រី ថៃ