UN បារម្ភខ្លាំងថា មនុស្សរាប់លាននាក់ នឹងត្រូវរងទុក្ខ ក្រោយរុស្ស៊ី ចាកចេញពីកិច្ចព្រមព្រៀងគ្រាប់ធញ្ញជាតិ

អគ្គលេខាធិការអង្គការសហប្រជាជាតិ លោក Antonio Guterres បាននិយាយកាលពីថ្ងៃចន្ទ ទី១៧ ខែកក្កដាថា មនុស្សរាប់លាននាក់ដែលប្រឈមភាពអត់ឃ្លាន នឹងត្រូវរងទុក្ខ ដោយសារតែការសម្រេចចិត្តរបស់រុស្ស៊ី ចាកចេញពីកិច្ចព្រមព្រៀងគ្រាប់ធញ្ញជាតិអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានប្រាប់អ្នកសារព័ត៌មាន នៅឯទីស្នាក់ការ UN ក្នុងទីក្រុងញូវយ៉កថា ចំណាត់ការរបស់ទីក្រុងមូស្គូ នឹងវាយប្រហារដល់មនុស្សដែលត្រូវការជំនួយ នៅគ្រប់ទីកន្លែង។

លោក Guterres និយាយថា “មនុស្សរាប់រយលាននាក់ប្រឈមនឹងភាពអត់ឃ្លាន ដោយសារតែពួកគេកំពុងប្រឈមមុខនឹងវិបត្តិឡើងថ្លៃទំនិញ-ម្ហូបអាហារជាសកល ដូច្នេះហើយពួកគេនឹងរងទុក្ខវេទនា”។

ប្រមុខ UN រូបនេះបន្ថែមថា លោកសោកស្តាយយ៉ាងខ្លាំង ចំពោះការសម្រេចចិត្តរបស់រុស្ស៊ី ប៉ុន្តែទោះជាយ៉ាងណា រឿងនោះនឹងមិនអាចបញ្ឈប់កិច្ចខិតខំប្រឹងប្រែងរបស់ UN ក្នុងការសម្រួលយកអាហារ និងជីពីអ៊ុយក្រែន និងរុស្ស៊ី ចូលទៅកាន់ទីផ្សារពិភពលោកបានឡើយ។

សូមបញ្ជាក់ថា កាលពីថ្ងៃចន្ទ ទី១៧ ខែកក្កដា រុស្ស៊ី បានប្រកាសផ្អាកការចូលរួមក្នុងកិច្ចព្រមព្រៀងដ៏សំខាន់មួយ ដែលអនុញ្ញាតឲ្យមានការនាំចេញគ្រាប់ធញ្ញជាតិរបស់អ៊ុយក្រែន។

កិច្ចព្រមព្រៀង ដែលសម្របសម្រួលដោយតួកគី និង UN កាលពីខែកក្កដាឆ្នាំ២០២២ បានផុតកំណត់ជាផ្លូវការនៅពាក់កណ្តាលអធ្រាត្រថ្ងៃចន្ទ ឈានចូលថ្ងៃអង្គារ ខណៈអ្នកនាំពាក្យវិមានក្រឹមឡាំង លោក Dmitry Peskov ក៏បានប្រាប់អ្នកយកព័ត៌មានដែរថា ចាប់ពីពេលនេះតទៅ រុស្ស៊ីនឹងមិនបន្តកិច្ចព្រមព្រៀងនេះទៀតនោះទេ ៕

ប្រែសម្រួល៖ Vann Vann

ប្រភព៖ CNA, CNN

ចុចអាន៖ UN ចោទថា រុស្ស៊ី បន្តរារាំងការផ្តល់ជំនួយមនុស្សធម៌ទៅឲ្យជនរងគ្រោះ ដោយបាក់ទំនប់