ក្រោយភឿថៃប្រកាសបំបែកខ្លួន សមាជិកបក្សលោកភីថា ៤ រូប សម្ដែងការខកចិត្ត និងឈឺចាប់ខ្លាំង

បន្ទាប់​ពី​ភឿ​ថៃ​ប្រកាស​បំបែក​ខ្លួនហើយរំសាយគណបក្សចម្រុះទាំង៨និងចរចា​បង្កើត​រដ្ឋាភិបាល​ជាមួយ​គណបក្ស​ដទៃកាលពីរសៀលម្សិលមិញ សមាជិកសភារបស់បក្សចលនា​ឆ្ពោះទៅមុខ​របស់​លោកភីថាបានសម្ដែងការខកចិត្ត និងឈឺចាប់ខ្លាំងយ៉ាងខ្លាំង។

យ៉ាងណាមិញ​ ដោយមិនបង្អង់យូរនោះទេ​ ខាង​បក្សលោកភីថា​ទាំង​សមាជិក​សភា អតីត​សមាជិក​សភា និង​អ្នក​ពាក់ព័ន្ធ​ទាំង​អស់​គ្នា​ចេញ​មុខ​ប្រឆាំង​ករណី​បែប​នេះលើបណ្ដាញអ៊ីនធឺណិត​ព្រោងព្រាត ​ខណៈពេល​ដែលម្នាក់ៗ​បញ្ចេញ​មតិក្នុងន័យ​ឈឺចាប់​និង​ខកចិត្ត​ខ្លាំងចំពោះទង្វើរបស់ភឿ​ថៃ​។

លោកស្រី Pannika Wanich ជា​ជំនួយការ​ឃោសនា​ឲ្យ​គណបក្ស​ចលនាឆ្ពោះទៅមុខ និងថ្នាក់ដឹកនាំនៃម​ហាវិទ្យាល័យវឌ្ឍនភាពបានបញ្ចេញសារលើ Twitter ដោយអមជាមួយរូបភាពនៃសេចក្តីថ្លែងការណ៍របស់គណបក្សភឿថៃថា “សូមអាន ហើយចងចាំ​គ្រប់​ពាក្យ”។

ចំណែក​លោកស្រី Amarat Chokepamitkul អតីត​សមាជិក​សភា​គណបក្ស​ចលនាឆ្ពោះទៅមុខ​បាន​ថ្លែង​ថា «ដល់​ម៉ោង​ដែល​សមាជិក​ព្រឹទ្ធសភា​មាន​ការ​គិតគូរ​ដល់​ប្រជាជនហើយ» ហើយ​ក៏​បាន​បង្ហោះ​ព័ត៌មានលើសារព័ត៌មាន The Reporters ផងដែរ ដោយ​បញ្ជាក់​ថា គណបក្ស​ភឿថៃ​នៅ​តែ​រំពឹង​ទុកថាបក្សចលនាឆ្ពោះទៅមុខនឹង​លើក​ដៃ​បោះ​ឆ្នោត​ឲ្យ​លោក Srettha Thavisin ជា​នាយក​រដ្ឋមន្ត្រី ប៉ុន្តែទោះជាយ៉ាង វាជា​ព័ត៌មាន​មិន​ត្រឹមត្រូវ ហើយមិន​ត្រូវ​គ្នា​នឹង​អ្វី​ដែល​ភឿថៃ​បាន​និយាយ​ក្នុង​កិច្ច​ប្រជុំ​នោះ​ទេ។

ចំណែក​លោក Wiroj Lakkhanaadisorn សមាជិកសភាគណបក្សក៏បាន​បង្ហោះតំណភ្ជាប់ទៅ​នឹងបទចម្រៀងតាមរយៈ Twitter ដែលច្រៀងថា​ ភាពទន់ខ្សោយនៃការជឿទុកចិត្តនរណាម្នាក់ ពោល​គឺ​ឈឺ​ចាប់​ស្ទើរ​តែ​បាត់​បង់ លទ្ធផល​គឺ​ខកចិត្តខ្លាំងសឹងតែគ្រប់គ្នា។

ដោយឡែក​​លោក Rangsiman Rome សមាជិក​សភា​ក្នុង​បញ្ជី និង​ជា​អ្នក​នាំ​ពាក្យ​គណបក្ស​លោកភីថា បានបង្ហាញ​ជំហរ​ចង់​ឲ្យ​គណបក្ស​ភឿ​ថៃ និង​គណបក្ស​ចលនាឆ្ពោះទៅមុខ រួម​ដៃ​គ្នា​ក្នុង​រដ្ឋាភិបាល។ លោកបាននិយាយថា “ខ្ញុំតែងតែយល់ថាយើង (ភឿថៃ និងចលនាឆ្ពោះទៅមុខ) នឹងក្លាយជាដៃគូល្អ មិត្តល្អ ប៉ុន្តែថ្ងៃនេះបានបញ្ចាក់ហើយថាពួកយើងមិនអាចទៅមុខជាមួយគ្នាបានទេ។

លើសពីនេះទៀត លោកក៏បានថ្លែងអំណរគុណដល់ក្រុមបាតុករ​ដែល​បញ្ចេញ​មតិ​ និង​ប្រជាពលរដ្ឋ​ដែល​បាន​គាំទ្រ​ ដោយចង់​ឃើញ​គណបក្ស​ទាំង ៨ ធ្វើ​ការ​ជាមួយ​គ្នា។ ប៉ុន្តែថ្ងៃនេះមិនមែនជាការសម្រេចរបស់គណបក្សចលនាឆ្ពោះទៅមុខនោះទេ ហើយនេះគឺជាការពិតដែលឈឺចាប់បំផុតរបស់​គណបក្ស​និងប្រជាជនទាំងអស់គ្នា៕

ប្រែសម្រួល៖ សាង ស្រីល័ក្ខ

ប្រភព៖Sanook

ចុចអាន៖បក្សភឿថៃ ពន្យល់មូលហេតុដើរចេញពីក្រុមចម្រុះដឹកនាំដោយលោក Pita